पुणे : फुरसुंगी-उरुळी देवाची नगरपरिषदेचे नगराध्यक्ष संतोष सरोदे यांच्यासह २८ नगरसेवकांनी निवडणुकीदरम्यान शपथपत्रासोबत बनावट कागदपत्रे सादर केल्याचा आरोप करत राज्य निवडणूक आयोगाकडे तक्रार करण्यात आली आहे. या तक्रारीची दखल घेत जिल्हाधिकारी कार्यालयाच्या नगरपालिका प्रशासन शाखेने नगरपरिषदेच्या मुख्याधिकाऱ्यांना या प्रकरणाची चौकशी करण्याचे आदेश दिले आहेत. चौकशीचा अहवाल सात दिवसांत सादर करण्याच्या सूचना देण्यात आल्या आहेत.
सामाजिक कार्यकर्ते नितीन ऊर्फ नीतेश गायकवाड यांनी ही तक्रार केली आहे. संबंधित नगरसेवकांनी निवडणूक लढवताना नियमांचे उल्लंघन केल्याचा दावा तक्रारीत करण्यात आला आहे. संबंधित नगरसेवकांचे सदस्यत्व रद्द करून नवीन प्रशासकाची नियुक्ती करावी, अशी मागणीही त्यांनी केली आहे. मात्र, तक्रारीतील आरोपांची सत्यता चौकशीनंतरच स्पष्ट होणार आहे.
राज्य निवडणूक आयोगाकडून प्राप्त झालेल्या पत्राच्या आधारे जिल्हाधिकारी कार्यालयाच्या नगरपालिका प्रशासन शाखेने फुरसुंगी-उरुळी देवाची नगरपरिषदेच्या मुख्याधिकाऱ्यांना पत्र पाठवले आहे. तक्रारीसोबत संबंधित कागदपत्रे जोडण्यात आल्याचेही पत्रात नमूद करण्यात आले आहे. तक्रारदाराने यापूर्वीही या प्रकरणासंदर्भात अनेक वेळा अर्ज केल्याचा उल्लेख करण्यात आला आहे.
दरम्यान, काही नगरसेवकांनी निवडणूक लढवताना थकबाकी असतानाही थकबाकी नसल्याचा दाखला सादर केल्याचा आरोप तक्रारीत करण्यात आला आहे. काही नगरसेवकांनी स्वतःचे घर असतानाही शपथपत्रात घर नसल्याचे नमूद केल्याचाही दावा करण्यात आला आहे. तसेच एका नगरसेवकाचे नाव दोन विधानसभा मतदारसंघांच्या मतदारयादीत असल्याचा आरोपही करण्यात आला आहे. या सर्व बाबींची पडताळणी करून चौकशीचा अहवाल विनाविलंब जिल्हाधिकारी कार्यालयाकडे सादर करण्याचे निर्देश मुख्याधिकाऱ्यांना देण्यात आले आहेत.
