पुणे : शहरातील उच्चभ्रू परिसर म्हणून ओळखल्या जाणाऱ्या कोरेगाव पार्कमध्ये मध्यरात्री गस्तीवर असलेल्या महिला पोलीस कर्मचाऱ्याला मद्यधुंद महिलेने शिवीगाळ करत कानशिलात मारल्याची घटना घडली आहे. लायटर मागण्यावरून सुरू झालेल्या वादाचे रूपांतर मारहाणीत झाले. याप्रकरणी कोरेगाव पार्क पोलीस ठाण्यात संबंधित महिलेविरुद्ध गुन्हा दाखल करण्यात आला आहे.
ही घटना रविवारी मध्यरात्री साडेबारा वाजण्याच्या सुमारास कोरेगाव पार्कमधील लेन क्रमांक ७ येथे ऑनिस हॉटेलजवळ घडली. ययाती मोतीगीर बामणे (वय ३०) या महिला पोलीस कर्मचारी रात्रीच्या गस्तीवर तैनात होत्या. परिसरात वाहतूक कोंडी झाल्यामुळे त्यांनी आपले सीआर मोबाईल वाहन रस्त्याच्या बाजूला उभे केले होते. त्याचवेळी हडपसर परिसरातील नोबल हॉस्पिटलजवळ राहणारी शीतल सुधाकर मोरे (वय ४८) ही महिला मद्यधुंद अवस्थेत तेथे आली. तिने बामणे यांच्याकडे लायटरची मागणी केली.
कर्तव्यावर असलेल्या पोलिसांकडे लायटर का मागत आहात, असा प्रश्न बामणे यांनी विचारला. यामुळे संतापलेल्या मोरे हिने महिला पोलीस कर्मचाऱ्याला अर्वाच्य भाषेत शिवीगाळ करण्यास सुरुवात केली. त्यानंतर तिने बामणे यांच्या कानशिलात मारल्याचे तक्रारीत नमूद करण्यात आले आहे. मध्यरात्री घडलेल्या या प्रकारामुळे परिसरात खळबळ उडाली.
या घटनेनंतर महिला पोलीस कर्मचारी ययाती बामणे यांनी कोरेगाव पार्क पोलीस ठाण्यात तक्रार दाखल केली. त्यानुसार पोलिसांनी शीतल सुधाकर मोरे हिच्याविरुद्ध गुन्हा नोंदवला आहे. महिला पोलीस कर्मचाऱ्याशी गैरवर्तन आणि मारहाण झाल्याच्या या प्रकरणाचा पुढील तपास कोरेगाव पार्क पोलीस करत आहेत.
