मुंबई : ठाण्यातील ठाकरे गटाचे विभागप्रमुख प्रदीप पूर्णेकर यांच्या हत्येमागील मुख्य कारण आता समोर आले आहे. पोलिसांनी याप्रकरणी एका संशयिताला ताब्यात घेतले असून त्याच्या चौकशीतून हत्येचा उलगडा झाला आहे. राजकीय आणि सामाजिक वादातूनच ही हत्या घडल्याची कबुली पकडण्यात आलेल्या आरोपीने दिली आहे.
कापूरबावडी पोलिसांनी दिलेल्या माहितीनुसार, पूर्णेकर यांच्यावर 5 फेऱ्या झाडण्यात आल्या होत्या. या घटनेत चार जणांचा सहभाग असून उर्वरित 3 आरोपींच्या शोधासाठी पोलिसांची पथके रवाना झाली आहेत. लवकरच त्यांनाही गजाआड केले जाईल, असा विश्वास सह पोलीस आयुक्त ज्ञानेश चव्हाण यांनी व्यक्त केला आहे.
या घटनेमुळे संपूर्ण ठाण्यात संतापाची तीव्र लाट पसरली आहे. मनोरमा नगरमधील स्थानिक नागरिक आणि शिवसैनिकांनी कापूरबावडी पोलीस ठाण्याबाहेर एकत्र येत जोरदार निदर्शने सुरू केली आहेत. मुख्य सूत्रधाराला तात्काळ अटक करावी, या मागणीसाठी पूर्णेकर कुटुंबीय आणि समर्थक आक्रमक झाले आहेत. जोपर्यंत सर्व दोषींना पकडले जात नाही, तोपर्यंत मृतदेह ताब्यात घेणार नाही आणि अंत्यसंस्कारही करणार नाही, असा इशारा स्थानिकांनी दिला आहे. प्रसंगी मृतदेह पोलीस ठाण्यात आणण्याचा इशाराही त्यांनी दिला आहे.
परिस्थितीचे गांभीर्य लक्षात घेऊन पोलीस ठाण्याबाहेर कडेकोट पोलीस बंदोबस्त तैनात करण्यात आला आहे. आंदोलक आणि नातेवाइकांना पोलिसांनी प्रवेशद्वारावरच रोखले आहे. प्रदीप पूर्णेकर यांचा मुलगा राम पूर्णेकर यांनी समर्थकांसह ठाण्यासमोर ठिय्या मांडल्यामुळे पोलिसांवर मोठा ताण आला आहे. दरम्यान, जे. जे. रुग्णालयातून मृतदेह ठाण्यात आणण्याची प्रक्रिया सुरू असून परिसरातील वातावरण अत्यंत तणावपूर्ण बनले आहे.
