पुणे : गेल्या काही दिवसांपासून राजकीय वर्तुळात आणि सोशल मीडियावर ज्या लग्नाची जोरदार चर्चा सुरू होती, अखेर त्यावर शिक्कामोर्तब झाले आहे.दिवंगत अजित पवार यांचे सुपुत्र आणि माजी खासदार पार्थ पवार लवकरच विवाहबंधनात अडकणार आहेत. प्रसिद्ध अभिनेत्री कायनात धार हिच्यासोबत त्यांचा साखरपुडा ठरला असून, या खास सोहळ्याची तारीख आता समोर आली आहे.आमदार रोहित पवार यांनी सोशल मीडियावरून पार्थ पवार यांच्या साखरपुड्याची निमंत्रण पत्रिका शेअर केली असून याची जोरदार चर्चा सुरु आहे.
आमदार रोहित पवारांनी ही पत्रिका पोस्ट करत आपल्या भावाला आणि होणाऱ्या वहिनीला भावी आयुष्यासाठी भरभरून शुभेच्छा दिल्या आहेत. त्यांनी आपल्या पोस्टमध्ये लिहिले, “प्रेमाच्या रेशीमगाठीत अडकून नवीन इनिंग सुरू करणारे माझे प्रिय बंधू पार्थ आणि कायनात, तुम्हा दोघांनाही साखरपुड्याच्या मनःपूर्वक शुभेच्छा! तुमचा पुढील प्रवास अत्यंत आनंदाचा, सुखाचा आणि समृद्धीचा जावो, हीच ईश्वरचरणी प्रार्थना.” त्यांची ही पोस्ट सध्या सोशल मीडियावर प्रचंड व्हायरल होत असून सर्वांचे लक्ष वेधून घेत आहे.
समोर आलेल्या माहितीनुसार, पार्थ पवार आणि कायनात धार यांचा साखरपुडा येत्या २९ जुलै रोजी पार पडणार आहे. पवार परिवारात सध्या आनंदाचे आणि उत्साहाचे वातावरण आहे. काही दिवसांपूर्वीच राष्ट्रवादी काँग्रेस (शरदचंद्र पवार पक्ष) खासदार सुप्रिया सुळे यांची कन्या रेवती सुळे यांचा विवाहसोहळा मुंबईत मोठ्या थाटामाटात संपन्न झाला होता. हा सोहळा ताजा असतानाच, आता अजित पवार गटाचे पार्थ पवार यांच्या घरातही लग्नाची लगबग सुरू झाली आहे.
पार्थ पवार आणि कायनात धार यांच्या या नवीन प्रवासाची घोषणा झाल्यापासून त्यांच्यावर सर्वच स्तरातून, विशेषतः राजकीय आणि मनोरंजन क्षेत्रातून शुभेच्छांचा वर्षाव होत आहे. दोघेही लवकरच आपल्या आयुष्याची नवीन सुरुवात करणार आहेत.
