मुंबई : दागिन्यांवरून झालेला वाद आणि चारित्र्यावरील संशयावरून २५ वर्षीय महिलेची टॉवेलने गळा आवळून हत्या केल्याची घटना घडली आहे. ही घटना मलबार हिल येथे घडली आहे. याप्रकरणी आरोपी पतीला मलबार हिल पोलिसांनी अटक केली आहे. याबाबत मृत महिलेच्या आईने पोलीस ठाण्यात तक्रार दाखल केली आहे. त्यावरून पोलिसांनी आरोपीविरोधात हत्येचा गुन्हा दाखल केल्याचे अधिकाऱ्याने सांगितले आहे. योगिता सुमीत वेदवंशी (वय-२५) असे मृत महिलेचे नाव आहे.
पोलिसांनी दिलेल्या माहितीनुसार, मलबार हिल येथील कंबाला हिल हायस्कूल शेजारी असलेल्या शिवाजी नगरमध्ये पतीसोबत राहत होत्या. पती सुमीत लक्ष्मण वेदवंशी (वय-३०) याच्यासोबत बुधवारी योगिताचा वाद झाला होता. या वादातून सुमीतने तिला मारहाण केली. त्यानंतर घरातील टॉवेलने योगिताचा गळा आवळला. त्यानंतर तिला तात्काळ जवळच्याच एलिझाबेथ रुग्णालयात दाखल करण्यात आले. मात्र, तेथील डॉक्टरांनी वैद्यकीय तपासणी केली असता तिचा मृत्यू झाल्याचे घोषित केले. या घटनेची माहिती मिळताच पोलिसांनी तात्काळ याप्रकरणी तपासाला सुरूवात केली.
चारित्र्याच्या संशयावरून खून
योगिताचे दागिने सुमीतने त्याचा मित्र अभिषेककडे गहाण ठेवले होते. तसेच चारित्र्याच्या संशयावरून त्यांच्यात सतत वाद होत असायचे. बुधवारी देखील असाच वाद झाला होता. त्यानंतर सुमीतने रागाच्या भरात पत्नीला जबर मारहाण केली. त्यानंतर टॉवेलने तिचा गळा आवळला, अशी माहिती लक्ष्मी यांनी पोलिसांना दिली. पोलिसांनी याप्रकरणी हत्येचा गुन्हा दाखल केला. त्यानंतर आरोपी सुमीतला त्याच्या राहत्या घरातून अटक केली. आरोपीने हत्येसाठी वापरलेला टॉवेलही पोलिसांना सापडला असून तो जप्त करण्यात आला आहे.
