मुंबई : मुंबईतील प्रसिद्ध लालबागच्या राजाच्या दर्शनासाठी दरवर्षी लाखोंच्या संख्येने भाविक दाखल होतात. अनंत चतुर्दशीच्या दिवशी लाडक्या गणरायाला निरोप देण्याची तयारी सुरू असतानाच लालबाग परिसरातून एक अत्यंत वाईट बातमी समोर आली आहे. गणेश मंडपाजवळ असलेल्या हनुमान मंदिरात बसलेले 68 वर्षीय विजय आणेकर यांची अचानक प्रकृती बिघडली आणि त्यांचा मृत्यू झाला.
मिळालेल्या माहितीनुसार, गुरुवारी रात्री विजय आणेकर हे हनुमान मंदिरात बसले असताना अचानक बेशुद्ध होऊन खाली पडले. ते लालबाग परिसरातीलच रहिवासी होते. घटनेनंतर तेथील उपस्थित लोकांनी त्यांना तात्काळ परळ येथील ग्लोबल हॉस्पिटलमध्ये उपचारासाठी दाखल केले. परंतु, डॉक्टरांनी तपासणीअंती त्यांना मृत घोषित केले. त्यांच्या मृत्यूचे नेमके कारण अद्याप समोर आले नसून काळाचौकी पोलीस या प्रकरणाचा पुढील तपास करत आहेत.
विशेष म्हणजे, या वर्षीच्या गणेशोत्सवात लालबाग परिसरात घडलेली ही दुसरी दुर्दैवी घटना आहे. यापूर्वी 17 सप्टेंबर रोजी पुण्यावरून दर्शनासाठी आलेला 25 वर्षीय तरुण जयदीप मेघराज नेमाडे याचाही गर्दीत अचानक तब्येत बिघडल्याने मृत्यू झाला होता.
काही दिवसांच्या अंतरात दोन भाविकांचा असा अचानक मृत्यू झाल्यामुळे लालबाग राजा मंडपातील वाढती गर्दी आणि भाविकांच्या आरोग्याचा प्रश्न ऐरणीवर आला आहे. सणाच्या काळात या ठिकाणी होणारी प्रचंड गर्दी लक्षात घेता वैद्यकीय आपत्कालीन सेवा, रुग्णवाहिका आणि तातडीच्या आरोग्य उपाययोजना अधिक सक्षम करण्याची गरज आता व्यक्त केली जात आहे.
