नवी मुंबई: बांधकाम व्यावसायिकाला धमकावून खंडणी उकळल्याच्या आरोपावरून रबाळे पोलिसांनी आरोपी त्रिभुवन लालबिहारी सिंह, वय 47 वर्षे या व्यक्तीला अटक केली आहे. संबंधित व्यक्ती आरटीआय कार्यकर्ता असल्याची माहिती पोलिस नोंदीत नमूद आहे. मे 2026 च्या पहिल्या आठवड्यापासून हा प्रकार सुरू असल्याचा आरोप तक्रारीत करण्यात आला आहे.
फिर्यादीचे नाव जितेंद्र प्रताप सिंह, वय 52 वर्षे, असे आहे. पोलिसांकडे दाखल झालेल्या तक्रारीनुसार, तक्रारदाराच्या ऐरोली तसेच दिघा परिसरातील बांधकामाच्या ठिकाणी वारंवार तक्रारी करून बिल्डींगवर कारवाई करण्याची धमकी देण्यात आली. तसेच आर्थिक नुकसान करण्याची भीती दाखवल्याचा आरोप आहे. तक्रारदाराला शिवीगाळ करून त्याच्यावर हल्ला करण्याबरोबरच हात-पाय तोडण्याची आणि जीवे मारण्याची धमकी दिली होती.
याशिवाय तक्रारदाराच्या मुलाला खोट्या गुन्ह्यात अडकवण्याची धमकी देऊन त्याच्या मनात भीती निर्माण केली. या भीतीचा फायदा घेत आरोपीने तक्रारदाराकडून आतापर्यंत रोख आणि ऑनलाइन पद्धतीने एकूण 1,35,000 घेतल्याचे पोलिस नोंदीत म्हटले आहे. त्यानंतर आणखी 5,000 देण्याची मागणी केली जात असल्याचा आरोप तक्रारीत करण्यात आला आहे.
या प्रकरणी तक्रारदाराने लेखी तक्रार दिल्यानंतर रबाळे पोलिस ठाण्यात गुन्हा नोंदवण्यात आला. प्रकरणात भारतीय न्याय संहितेतील खंडणी, धमकी आणि संबंधित कलमांनुसार कारवाई करण्यात आली आहे. रबाळे पोलिस ठाण्याचे वरिष्ठ पोलिस निरीक्षक बाळकृष्ण सावंत यांनी आरोपीला अटक केल्याची माहिती दिली.
पोलिसांनी तक्रारदाराचा जबाब नोंदवला असून तपास सुरू आहे. रबाळे पोलिस ठाण्याचे अधिकारी आणि डीबी पथकाने प्रकरणाचा तपास केला आहे. पोलिस नोंदीनुसार, संबंधित व्यक्तीविरोधात यापूर्वीही विविध पोलिस ठाण्यांमध्ये गुन्हे दाखल असून याप्रकरणी अधिक तपास सुरु आहे.
