मुंबई : ठाण्यात ठाकरे गटाचे निष्ठावंत कार्यकर्ते प्रदीप पूर्णेकर यांची गोळ्या झाडून हत्या करण्यात आल्याने संपूर्ण महाराष्ट्रात खळबळ उडाली आहे. या घटनेनंतर ठाकरे गटाचे खासदार संजय राऊत यांनी थेट शिंदे गटावर गंभीर आरोप केले आहेत.या हत्येमागे माजी महापौर मीनाक्षी शिंदे, त्यांचे कुटुंब आणि शिंदे गटाशी संबंधित घटकांचा हात असल्याचा गंभीर आरोप त्यांनी केला आहे.
संजय राऊत म्हणाले की, ठाणे शहर सध्या गुन्हेगारांचे आश्रयस्थान बनले असून कायदा व सुव्यवस्थेची परिस्थिती अत्यंत ढासळली आहे. गेल्या एका महिन्यात ठाण्यात पाच हत्या झाल्याचा दावा करत, 25 सप्टेंबर रोजी गस्तीवर असलेल्या किसन भोईर या पोलीस अधिकाऱ्याचाही बळी गेल्याचे त्यांनी स्पष्ट केले. गृहखाते आणि ठाणे पोलीस आयुक्त निष्क्रीय असून पोलीस आयुक्त हे सत्ताधारी नेत्यांच्या दबावाखाली काम करत असल्याचा थेट आरोप त्यांनी केला.
पूर्णेकर हे परिसरातील क्लस्टर योजना, बेकायदेशीर बिल्डरशाही आणि अमली पदार्थांच्या (ड्रग्ज) रॅकेटविरोधात सातत्याने आवाज उठवत होते. त्यांनी यासंदर्भात पोलिसांकडे अनेकदा तक्रारीही नोंदवल्या होत्या. राऊत यांच्या दाव्यानुसार, हा सामाजिक लढा बंद पाडण्यासाठीच त्यांची हत्या घडवून आणली गेली. या हत्येमागे माजी महापौर मीनाक्षी शिंदे, त्यांचे कुटुंब आणि शिंदे गटाशी संबंधित घटकांचा हात असल्याचा गंभीर आरोप त्यांनी केला आहे.
या संपूर्ण प्रकरणाची चौकशी करून दोषींवर कठोर कारवाई करावी, मुख्य सूत्राधारांना तात्काळ अटक करावी आणि निष्काळजीपणा करणाऱ्या ठाण्याच्या पोलीस आयुक्तांची हकालपट्टी करावी, अशी ठाम मागणी संजय राऊत यांनी लावून धरली आहे.
