पुणे : बहुचर्चित केतन अग्रवाल हत्या प्रकरणात महत्वाचा पुरावा समोर आला आहे.18 जून रोजी लोहगडावर आलेल्या काही पर्यटकांच्या मोबाईल आणि कॅमेरामधील फोटोनी मोठा खुलासा केला आहे.या फोटोंच्या तपासातून मृत केतन अग्रावाल, मुख्य आरोपी सिया गोयल आणि चेतन चौधरी हे तिघेही एकाच वेळी लोहगडावर एकत्र उपस्थित असल्याचे स्पष्ट पुरावे पोलिसांच्या हाती लागले आहेत. आरोपींनी रचलेला अपघाताचा बनाव या छायाचित्रांमुळे पूर्णपणे उघडा पडला आहे.
घटना घडली त्या दिवशी गडावर आलेल्या इतर पर्यटकांनी काढलेल्या कॅमेरा आणि मोबाईलमधील छायाचित्रांची पोलिसांनी सखोल पाहणी केली. या हत्याकांडाबाबत एका प्रत्यक्षदर्शीने दिलेली माहिती अत्यंत महत्त्वाची ठरली आहे. त्याने दिलेल्या माहितीनुसार, घटनेच्या वेळी सियाने चेतनकडे काही गूढ इशारे केले आणि केतनला लाथ मारली. त्याच क्षणी चेतनने केतनला थेट खोल दरीमध्ये लोटून दिले. हा सर्व थरार डोळ्यांदेखत पाहणाऱ्या प्रत्यक्षदर्शीने आरोपीकडे विचारणा केली असता, “तू शांत राहा, नाहीतर तुलाही दरीत फेकून देईन,” अशी थेट जीवे मारण्याची धमकी चेतनने त्याला दिली.
या धमकीमुळे घाबरलेल्या साक्षीदाराने सुरुवातीला कोणाला काही सांगितले नाही. मात्र, बातम्यांमधून हत्येचा प्रकार समोर आल्यानंतर त्याने धैर्याने पोलिसांशी संपर्क साधून आपला जबाब नोंदवला.या पर्यटकांच्या फोटोंमधील पुरावे आणि प्रत्यक्षदर्शीचा जबाब यांमुळे या गुन्ह्याचा उलगडा करण्यात पोलिसांना मोठे यश आले आहे.
सुरुवातीला अपघाती मृत्यू वाटणाऱ्या या घटनेला आता एक मोठे वळण मिळाले आहे. पुणे ग्रामीण पोलिसांनी या संपूर्ण कटाचा पर्दाफाश करत न्यायालयात तब्बल 5,300 पानांचे भक्कम दोषारोपपत्र दाखल केले आहे.यातून नवनवीन खुलासे समोर येत आहेत.
