जळगाव: लग्नासाठी सासरच्यांनी त्यांच्या होणाऱ्या सुनेला घेण्यासाठी चक्क हेलिकॉप्टर पाठवून मुलीसह तिच्या कुटुंबीयांना आश्चर्याचा धक्का दिला आहे. हा अजब गजब लग्नसोहळा पाहून सगळ्यांनाच आश्चर्याचा धक्काच दिला आहे. यामुळे या अनोख्या विवाह सोहळ्याची सर्वत्र चर्चा झाली आहे.
अमळनेर येथील प्रसिद्ध बांधकाम व्यावसायिक सरजू गोकलाणी यांचा एकुलत्या एक मुलाचा आशिष यांचा विवाह अहमदनगर येथील प्रसिद्ध उद्योजक संजय चंदानी यांची मुलगी सिमरन हिच्याशी अमळनेर शहरात पार पडत आहे.
आशिष हा इंजिनियर आहे तर सिमरन चंदानी ही सुद्धा उच्चशिक्षित असून मुलांच्या शिक्षण पद्धतीवर आधारित असलेल्या एका प्रसिद्ध कंपनीच्या एज्युकेशन ॲपमध्ये संचालक पदावर कार्यरत आहेत. एकुलता एक मुलगा असल्याने त्याचा विवाह शाही थाटात व्हावा, असे सरजू गोकलाणी यांचे स्वप्न होते. तसेच मुलगी नसल्याने घरात येणाऱ्या सुनेला त्यांनी मुलगी मानले होते.
सुनबाईला तिच्या गावावरून लग्नाच्या ठिकाणी आणण्यासाठी गोकलानी यांनी चक्क हेलिकॉप्टर ची व्यवस्था केली. लाखो रुपये खर्च करून हेलिकॉप्टर उपलब्ध केले. त्यानुसार त्यांनी सुनबाईला तसेच तिच्या कुटुंबियांना न कळवता आज थेट सुनबाईला लग्नाच्या ठिकाणी अमळनेर येथे आणण्यासाठी हेलिकॉप्टर पाठवून नवरी मुलगी सिमरन व तिच्या कुटुंबियांना आश्चर्याचा धक्का दिला.
अहमदनगर येथून चक्क हेलिकॉप्टर मध्ये बसून नवरी मुलगी सिमरन व तिच्या कुटुंबियांचे अंमळनेर येथे आज आगमन झाले. ज्या ठिकाणी हेलिकॉप्टर उतरले. त्या ठिकाणी सिमरनच्या स्वागतासाठी जय्यत तयारी करण्यात आली होती. यानंतर दोघेही जोडपे सुरुवातीला अमळनेर येथील मंगळ ग्रह मंदिरावर दर्शनासाठी गेले या ठिकाणी त्यांनी हेलिकॉप्टर मधून मंदिरावर पुष्पृष्टी करत सर्वांचेच लक्ष वेधले आहे.
