Uruli Kanchan : आगामी निवडणुकीच्या पार्श्वभूमीवर भाजपचे उत्तर जिल्हाध्यक्ष प्रदीप दादा कंद यांच्या नावावर “हवेलीचे भावी आमदार” म्हणून विधान परिषदेवर वर्णी लागण्याची शक्यता वर्तवली जात आहे. राज्याचे महसूल मंत्री चंद्रशेखर बावनकुळे यांनी केलेल्या एका वक्तव्यानंतर हवेली विधानसभा मतदारसंघाच्या राजकीय वर्तुळात मोठी खळबळ उडाली आहे.
छत्रपती शिवाजी महाराज महाराजस्व अभियानाअंतर्गत समाधान शिबाराचे उदघाटन महसूलमंत्री चंद्रशेखर बावनकुळे यांच्या हस्ते लोणीकंद (ता. हवेली) येथे नुकतेच पार पडले. यावेळी बावनकुळे बोलत होते. या कार्यक्रमात बोलत असल्याची सोशल मिडीयात एक रील व्हायरल होत आहे. त्यामुळे तर्कवितर्कांना आता उधाण आले आहे.
महसूल मंत्री चंद्रशेखर बावनकुळे यांनी एका कार्यक्रमादरम्यान प्रदीप कंद यांच्या कार्याचा गौरव करत, त्यांच्यावर आगामी काळात मोठी जबाबदारी सोपवली जाईल असे संकेत दिले. या वक्तव्यामुळे प्रदीप कंद यांची विधान परिषदेवर आमदार म्हणून वर्णी लागणार का याकडे सर्वांचे लक्ष लागले आहे. तसेच बावनकुळेंसारख्या वजनदार नेत्याने पाठीवर शाबासकीची थाप टाकल्यामुळे भाजपच्या गोटात नवा उत्साह संचारला आहे.
जिल्हा परिषदेचे माजी अध्यक्ष म्हणून प्रदीप कंद यांनी हवेली तालुका आणि पुणे जिल्ह्यात आपला स्वतंत्र ठसा उमटवला आहे. त्यांच्या याच कामाची दखल घेत मंत्र्यांनी केलेल्या सूचक विधानामुळे त्यांना विधिमंडळात स्थान मिळणार असल्याचे स्पष्ट होत आहे. जिल्हा परिषदेचे माजी अध्यक्ष व पुणे जिल्हा मध्यवर्ती सहकारी बँकेचे संचालक म्हणून त्यांनी ग्रामीण भागातील पाणी, शिक्षण आणि आरोग्याचे प्रश्न प्रभावीपणे हाताळले आहेत. पूर्व हवेलीतील ग्रामपंचायतींमध्ये त्यांचा शब्द महत्त्वाचा मानला जातो.
View this post on Instagram
दरम्यान, बावनकुळे यांनी केलेल्या प्रदीप कंद यांच्या संभाव्य आमदारकीच्या वक्तव्यामुळे मतदारसंघातील राजकीय समीकरणे पूर्णपणे बदलणार आहेत. जर त्यांची विधान परिषदेवर वर्णी लागली, तर हवेली तालुक्यातील भाजपची ताकद कित्येक पटीने वाढणार आहे. महसूल मंत्र्यांच्या या “मास्टरस्ट्रोक” मुळे विरोधकांमध्येही चिंतेचे वातावरण निर्माण झाले आहे.
