TCS Case : बहुराष्ट्रीय आयटी कंपनीतील महिला अत्याचार आणि धार्मिक भावना दुखावल्याच्या प्रकरणात नाशिक जिल्हा सत्र न्यायालयात आज सुनावणी पार पडली. शफी शेख आणि रज्जाक मेमन या दोन्ही संशयितांना न्यायालयात हजर करण्यात आले असून, न्यायालयाने त्यांना 18 एप्रिलपर्यंत 3 दिवसांची पोलीस कोठडी सुनावली. ही सुनावणी इन कॅमेरा पद्धतीने घेण्यात आली.
सदर प्रकरणाच्या तपासासाठी पोलिसांनी दोन्ही आरोपींच्या पोलीस कोठडीची मागणी केली होती. दोन्ही बाजूंचा युक्तिवाद ऐकल्यानंतर न्यायालयाने ही मागणी मान्य केली. सुनावणीदरम्यान आरोपी शफी शेख याने कारागृहात इतर कैद्यांकडून मारहाण झाल्याचा दावा केला. या पार्श्वभूमीवर प्रकरणाच्या गांभीर्यामुळे कडक पोलीस बंदोबस्तात सुनावणी पार पडली. तपास यंत्रणा या प्रकरणातील इतर संबंधित व्यक्ती आणि धागेदोरे शोधण्याचा प्रयत्न करत आहेत.
सुनावणीनंतर आरोपींचे वकील राहुल कासलीवाल यांनी प्रतिक्रिया देताना, पोलीस कोठडीची मागणी करण्यामागे ठोस कारण नसल्याचा दावा केला. मोबाईल जप्ती आणि पुढील चौकशीसंदर्भात तपास यंत्रणांनी पुरेसा खुलासा केलेला नसल्याचे त्यांनी सांगितले. या प्रकरणात वेगवेगळे गुन्हे दाखल करण्यात आल्याबाबतही त्यांनी प्रश्न उपस्थित केला.
