पुणे : गुजरातमधील सायबर दहशतवाद प्रकरणाच्या तपासाला वेग देत राष्ट्रीय तपास यंत्रणेने (NIA) देशातील पाच राज्यांमध्ये एकाच वेळी पाच ठिकाणी झडती घेतली. महाराष्ट्रातील पुणे जिल्ह्यातील जुन्नर, गुजरातमधील नडियाद, तेलंगणातील रामगुंडम, बिहारमधील गोपालगंज आणि दिल्ली येथे ही कारवाई करण्यात आली.
या कारवाईदरम्यान पुणे जिल्ह्यातील जुन्नर शहरातील माई मोहल्ला परिसरात एका संशयिताची चौकशी करण्यात आल्याची माहिती आहे. चौकशीत नेमके काय निष्पन्न झाले, याबाबत अद्याप अधिकृत माहिती समोर आलेली नाही. मात्र, संबंधित संशयिताचे सिमकार्ड जप्त करण्यात आल्याची प्राथमिक माहिती मिळाली आहे. या कारवाईला NIAकडून अद्याप अधिकृत दुजोरा मिळालेला नाही.
NIAच्या प्रसिद्धी निवेदनानुसार, ही कारवाई RC-01/2025/NIA/AMD या गुजरात सायबर दहशतवाद प्रकरणाशी संबंधित आहे. या प्रकरणाची नोंद 25 जून 2025 रोजी करण्यात आली होती. तपासात समोर आलेल्या माहितीनुसार, आरोपींनी ऑपरेशन सिंदूरच्या काळात भारत सरकारच्या विविध संस्थांच्या 54 संकेतस्थळांवर अत्याधुनिक DDoS हल्ले करण्याचा प्रयत्न केला होता. या हल्ल्यांमध्ये महत्त्वाच्या संगणकीय संसाधनांसह Critical Information Infrastructureला लक्ष्य करण्यात आल्याचा आरोप आहे.
राष्ट्रीय सार्वभौमत्व, सुरक्षा आणि एकात्मतेला बाधा पोहोचवणे तसेच नागरिकांमध्ये भीती निर्माण करणे हा या हल्ल्यांचा उद्देश असल्याचे तपास यंत्रणेचे म्हणणे आहे. या प्रकरणात आतापर्यंत दोन आरोपींना अटक करण्यात आली आहे. सुरुवातीला या प्रकरणाची नोंद गुजरात ATSने केली होती.
तपासादरम्यान करण्यात आलेल्या तांत्रिक विश्लेषणातून आरोपींना DDoS हल्ल्यांसाठी तयारी आणि कौशल्य वाढविण्यास मदत करणाऱ्या काही संशयितांची माहिती तपास यंत्रणेला मिळाली. त्यानंतर सक्षम न्यायालयाकडून झडती वॉरंट घेऊन संबंधित संशयितांच्या ठिकाणी कारवाई करण्यात आली.
झडतीदरम्यान हॅकिंगशी संबंधित आक्षेपार्ह माहिती असलेली डिजिटल उपकरणे आणि कागदपत्रे जप्त करण्यात आली. यामध्ये तीन लॅपटॉप, पाच मोबाईल फोन, पेन ड्राइव्हसह इतर डिजिटल उपकरणांचा समावेश आहे. अटक आरोपींशी संशयितांचे संबंध आहेत का, याबाबतही चौकशी करण्यात आली.
मात्र, ही उपकरणे नेमक्या कोणत्या ठिकाणांहून जप्त करण्यात आली, याची अधिकृत माहिती अद्याप समोर आलेली नाही. या प्रकरणाचा पुढील तपास NIAकडून सुरू आहे.
