पुणे : बीडमधील प्रसिद्ध हॉटेल व्यावसायिक विलास घुले यांच्या हत्या प्रकरणानंतर जिल्हा पोलीस दलात मोठे फेरबदल झाले आहेत. या घटनेचे तीव्र पडसाद उमटत असतानाच, बीडचे पोलीस अधीक्षक नवनीत काँवत यांनी एकाच वेळी 6 पोलीस निरीक्षकांच्या तडकाफडकी बदल्यांचे आदेश जारी केले आहेत. या कारवाईमुळे स्थानिक पोलीस प्रशासनात कमालीची खळबळ उडाली आहे.
या संपूर्ण बदली प्रक्रियेत सर्वात महत्त्वाची आणि चर्चेत असलेली बदली म्हणजे पोलीस निरीक्षक स्वप्नील उनवणे यांची. विलास घुले खून प्रकरणावरून उनवणे यांच्यावर गंभीर आरोप करण्यात आले होते. मात्र, आश्चर्याची बाब म्हणजे त्यांनी स्वतःहून केलेल्या विनंतीचा विचार करून त्यांची नियुक्ती आता बीडच्या आर्थिक गुन्हे शाखेत करण्यात आली आहे.
याचसोबत, विविध कारणांमुळे आणि वादांमुळे चर्चेत राहिलेले पोलीस निरीक्षक अशोक मुदिराज यांची सायबर पोलीस ठाण्यात रवानगी करण्यात आली आहे. सायबर शाखेची जबाबदारी सांभाळणारे पोलीस निरीक्षक नीलेश केळे यांच्याकडे आता पेठ बीड पोलीस ठाण्याचा पदभार सोपवण्यात आला आहे. तर दुसरीकडे, आर्थिक गुन्हे शाखेत कार्यरत असलेले पोलीस निरीक्षक संतोष शेजाळ यांची बीड मुख्यालय येथे प्रभारी पोलीस उपअधीक्षक म्हणून बदली झाली आहे.
या अंतर्गत फेरबदलांमध्ये इतर काही महत्त्वाच्या पोलीस ठाण्यांच्या प्रमुखांनाही बदलण्यात आले आहे. त्यानुसार पोलीस निरीक्षक प्रविणकुमार बांगर यांची माजलगाव शहर पोलीस ठाण्यात बदली करण्यात आली असून, पोलीस निरीक्षक राहुल सूर्यतळ यांच्याकडे केज पोलीस ठाण्याची नवीन जबाबदारी सोपवण्यात आली आहे.
हॉटेल व्यावसायिक घुले यांच्या हत्येनंतर बीड पोलीस प्रशासनावर मोठ्या प्रमाणावर दबाव निर्माण झाला होता. कायदा व सुव्यवस्था अबाधित राखण्यासाठी आणि तपासाला गती देण्यासाठी पोलीस अधीक्षकांनी उचललेले हे पाऊल अत्यंत महत्त्वाचे मानले जात आहे. या बदल्यांमुळे जिल्ह्यातील पोलीस यंत्रणेत मोठे फेरबदल पाहायला मिळत आहेत.
