सासूला
Pune Prime News : बिहारच्या जमुई जिल्ह्यात चित्रपटाच्या कथेलाही लाजवेल असा एक धक्कादायक प्रकार समोर आला आहे. तीन मुलांचा बाप असलेल्या एका तरुणाचं आपल्याच सासूवर जीव जडला. खरं तर सासू देखील त्याच्या चांगलीच प्रेमात पडली होती. दोघेही एकमेकांवर जीवापाड प्रेम करत होते. दोघांनाही एकमेकांशिवाय करमत नव्हतं. अशातच पत्नी झोपी गेल्यानंतर रविवारी रात्री जावई सासूला भेटण्यासाठी थेट सासूरवाडीला गेला.
मात्र, त्याचवेळी सासरच्या मंडळींनी त्याला बघितलं. यावेळी सासरकडील मंडळींसह गावकऱ्यांनी या तरुणाची बेदम धुलाई केली. त्याला झाडाला बांधून चांगलाच चोप दिला. सुनील यादव असं या तरुणाचं नाव आहे. या मारहाणीचा व्हिडीओ सध्या सोशल मीडियावर जोरदार व्हायरल होत आहे.
मिळालेल्या अधिक माहितीनुसार, बाघमा गावातील रहिवासी असलेल्या सुनीलचे कल्ला गावातील एका तरुणीसोबत लग्न झाले होते. काही दिवसांच्या सुखी संसारानंतर या जोडप्याला तीन मुलं देखील झाली आहेत. मात्र, याच काळात सुनीलचे आपल्या सासूवर प्रेम जडले. त्याचा सासरा आणि मेहुणा बाहेरगावी कामाला असल्याने सुनील आपल्या पत्नीला अंधारात ठेऊन नेहमी सासूला भेटण्यासाठी जात असायचा.
त्या रात्री सुनीलचे पत्नीसोबत भांडण झाल्यामुळे तो सासूला भेटण्यासाठी कल्ला गावात गेला. तिथे दोघेही एकत्र असताना अचानक सुनीलचा सासरा आणि मेहुणा घरी आला. त्यांनी सुनीलला सासूसोबत नको त्या अवस्थेत पाहिलं. यावरून दोघांनाही राग अनावर झाला, त्यांनी गावातील लोकांना बोलावून सुनीलला बेदम चोप दिला.
एवढंच नाही तर, गावातील लोकांनी सुनीलला एका झाडाला बांधून ठेवले. याची माहिती त्याच्या पत्नीला देण्यात आली. आईसोबत नवऱ्याचे प्रेमसंबध असल्याचं कळताच सुनीलच्या पत्नीलाही राग अनावर झाला. तिने देखील त्याला चप्पलेनं बेदम मारहाण केली.
