पुणे : पुण्यातील प्रसिद्ध बांधकाम व्यावसायिक आणि लेबर कॉन्ट्रॅक्टर खलील शेख यांच्या आत्महत्या प्रकरणामुळे राजकीय वर्तुळात मोठी खळबळ उडाली आहे. या प्रकरणात अडकलेले माजी आमदार आणि शिंदे गटाचे नेते रवींद्र धंगेकर आणि त्यांच्या पत्नी प्रतिभा धंगेकर यांच्या अडचणीत वाढ झाली आहे. स्वारगेट पोलिसांनी या प्रकरणी धंगेकर दाम्पत्यासह एकूण 14 जणांवर गुन्हा दाखल केला असून, सध्या हे दोघेही ‘नॉट रिचेबल’ झाले आहेत. पोलीस त्यांच्या मागावर असून कोणत्याही क्षणी त्यांना अटक होण्याची शक्यता वर्तवली जात आहे.
नेमके प्रकरण काय आहे?
खलील शेख हे 2011 पासून पुण्यामध्ये सेंट्रिंग आणि बांधकामाची कामे करत होते. कामाचा विस्तार करण्यासाठी त्यांनी बाजारातून व्याजाने मोठी रक्कम घेतली होती. ‘उत्कर्ष असोसिएट’ या भागीदारी फर्ममध्ये रवींद्र धंगेकर यांच्या पत्नी, बाळा शेडगे आणि रघू गौडा यांच्या पत्नी भागीदार होत्या. मात्र, शेख यांच्या पत्नीने दिलेल्या तक्रारीनुसार, हे सर्वजण केवळ नावापुरतेच भागीदार होते आणि या फर्मचा संपूर्ण मुख्य कारभार स्वतः रवींद्र धंगेकर हेच सांभाळत होते.
भागीदारांनी व्याजासह पैसे परत करण्याचे आश्वासन दिले होते, परंतु प्रत्यक्षात कोणाकडूनही पैसे मिळाले नाहीत. खलील शेख यांनी आत्महत्येपूर्वी लिहिलेल्या चिठ्ठीत त्यांचे तब्बल 2.5 कोटी रुपये येणे बाकी असल्याचे म्हटले आहे. पैशांसाठी सतत हेलपाटे मारूनही न्याय न मिळाल्याने ते प्रचंड मानसिक तणावाखाली होते आणि याच त्रासाला कंटाळून त्यांनी गळफास लावून आपले आयुष्य संपवले.
आत्महत्या करण्यापूर्वी खलील शेख यांनी एक व्हिडिओ बनवला होता. तसेच त्यांनी लिहिलेली एक चिठ्ठी घटनास्थळावरील इमारतीच्या बाहेर चिकटवली होती, तर दुसरी चिठ्ठी त्यांच्या खिशात सापडली. या सुसाईड नोट आणि व्हिडिओमध्ये त्यांनी थेट रवींद्र धंगेकर, त्यांच्या पत्नी प्रतिभा धंगेकर, मनसेचे माजी नगरसेवक बाळा शेडगे आणि त्यांच्या पत्नी वर्षा शेडगे यांच्यासह इतर भागीदारांना आपल्या मृत्यूसाठी थेट जबाबदार धरले आहे.
पोलीस अटकेपासून वाचण्यासाठी धंगेकर दाम्पत्याने कायदेशीर हालचाली गतिमान केल्या आहेत. त्यांनी न्यायालयात अटकपूर्व जामिनासाठी अर्ज केला असून, यावर सोमवारी सुनावणी होणार आहे. तत्पूर्वी पोलिसांच्या हाती लागू नये म्हणून त्यांनी अज्ञात स्थळी पळ काढला आहे. दुसरीकडे, पुणे पोलिसांनी धंगेकरांचा शोध घेण्यासाठी विविध पथके रवाना केली असून पैशांच्या व्यवहाराचा सखोल तपास सुरू केला आहे.
