वर्धा : जिल्ह्यातील शेकापूर (बाई) गावात अनैतिक संबंधात पतीने अडथळा निर्माण केल्याने पत्नीनेच प्रियकर आणि त्याच्या सहकाऱ्यांच्या मदतीने पतीची निर्घृण हत्या केल्याची धक्कादायक घटना समोर आली आहे. याप्रकरणी वडनेर पोलिसांनी तत्परता दाखवत आरोपी पत्नीसह एकूण 4 जणांना बेड्या ठोकल्या आहेत.
संतोष पांडुरंग कैकाडे (वय 42) असे खून झालेल्या दुर्दैवी पतीचे नाव आहे. पोलिसांनी दिलेल्या माहितीनुसार, संतोष यांची पत्नी सपना कैकाडे हिचे शुभम कैकाडे याच्यासोबत प्रेमसंबंध होते. या अनैतिक संबंधांची माहिती संतोष यांना झाल्याने त्यांच्यात वारंवार वाद होत होते. पतीचा हा अडसर कायमचा दूर करण्यासाठी सपनाने प्रियकर शुभमच्या मदतीने संतोष यांच्या हत्येचा कट रचला.
या कटात शुभमने आपले मित्र सचिन प्रभाकर बसुणे आणि प्रशांत रमेश करपे यांनाही सहभागी करून घेतले. चौघांनी मिळून संतोष यांचा गळा आवळून त्यांचा गेम केला. हत्येनंतर हा प्रकार अपघात किंवा आत्महत्येचा वाटवा आणि पोलिसांचा संशय येऊ नये, म्हणून त्यांनी मृतदेह गावाजवळील बोबडे यांच्या शेतातील विहिरीत फेकून दिला.
मात्र, पोलिसांच्या चौकशीत हा सर्व प्रकार उघडकीस आला. मृत संतोष यांचे भाऊ देवानंद कैकाडे यांनी दिलेल्या तक्रारीवरून वडनेर पोलीस ठाण्यात गुन्हा नोंदवण्यात आला आहे. पोलिसांनी भारतीय न्याय संहितेच्या (BNS) कलम 103(1) आणि 3(5) अंतर्गत कारवाई करत सपना कैकाडे, शुभम कैकाडे, सचिन बसुणे आणि प्रशांत करपे या चारही आरोपींना तातडीने अटक केली आहे.
वडनेर पोलीस सध्या या घटनेचा पुढील अधिक तपास करत असून आरोपींची कसून चौकशी सुरू आहे. या घटनेमुळे परिसरात तीव्र संताप व खळबळ उडाली आहे.
