पुणे : गेल्या काही दिवसापासून शहरात गुन्हेगारीच्या घटना दिवसेंदिवस वाढत चालल्या आहेत. अशातच आता पिंपरी चिंचवड शहरातील भोसरी परिसरामध्ये एका दगडखाणीत एक हात पाय आणि मुंडके कापून टाकलेल्या व्यक्तीचा मृतदेह आढळून आल्याने खळबळ उडाली आहे.
याबाबत अधिक माहिती अशी की, गोडाऊन चौक येथून काहीशा अंतरावर असलेल्या दगड खाणीमध्ये एका व्यक्तीचा मृतदेह आढळून आल्याची माहिती मिळताच दिघी पोलीस स्टेशनचे अधिकारी व कर्मचारी घटनास्थळी दाखल झाले आहेत. मृत व्यक्तीजवळ एक मोबाईल आढळून आल्याने पोलिसांनी अज्ञात व्यक्तीच्या मृतदेहाची ओळख पटवली आहे. सिताराम ढाले (वय 42 वर्ष रा. नांदगाव, ता. तुळजापूर, जि. धाराशिव ) असं मृत व्यक्तीचं नाव आहे.
मिळालेल्या माहितीनुसार,ही व्यक्ती सध्या भोसरीतच राहत होती.मात्र गेल्या चार दिवसांपासून सदर व्यक्ती बेपत्ता होता. अखेर त्याचा मृतदेह दगडखाणीत आढळून आला आहे. सिताराम प्रभू ढाले या व्यक्तीचा खून कुणी व का केला? हे अद्याप समजू शकलेले नाही. दिघी पोलीस या प्रकरणाचा तपास करत आहेत.
