मुंबई : यंदाच्या दसरा मेळाव्याकडे संपूर्ण राज्याचे लक्ष लागले असून, मुंबईत शिवसेना (उद्धव बाळासाहेब ठाकरे पक्ष) आणि शिवसेना (शिंदे गट) यांचे स्वतंत्र मेळावे होणार आहेत. दोन्ही बाजूंनी जोरदार तयारी सुरू असून, या निमित्ताने नेतेमंडळी काय राजकीय भूमिका घेतात, याबद्दल उत्सुकता शिगेला पोहचली आहे.
दरवर्षीप्रमाणे उद्धव ठाकरे यांच्या नेतृत्वाखालील ठाकरे गटाचा मेळावा दादरच्या ऐतिहासिक शिवाजी पार्क (शिवतीर्थ) मैदानावर संध्याकाळी 6 वाजता सुरू होईल. 1966 मध्ये शिवसेनाप्रमुख बाळासाहेब ठाकरे यांनी याच मैदानातून दसरा मेळाव्याची सुरुवात केली होती. बाळासाहेबांच्या निधनानंतरही उद्धव ठाकरेंनी ही परंपरा कायम राखली आहे. 2022 मध्ये पक्षात फूट पडल्यानंतरही ठाकरेंनी शिवाजी पार्क सोडले नाही. यंदाच्या या मेळाव्यात उद्धव ठाकरे यांच्यासह आदित्य ठाकरे, संजय राऊत, सुषमा अंधारे आणि अनिल परब यांची भाषणे होणार आहेत.यातून ते काय तोफ डागणार याकडे राजकीय वर्तुळाचे लक्ष लागले आहे.
दुसरीकडे, उपमुख्यमंत्री एकनाथ शिंदे यांच्या नेतृत्वाखालील शिंदे गटाचा दसरा मेळावा गोरेगाव येथील नेस्को मैदानात पार पडणार आहे . या मेळाव्यात एकनाथ शिंदे यांच्यासह भरत गोगावले, शहाजीबापू पाटील, संजय शिरसाठ, रामदास कदम, श्रीकांत शिंदे आणि उदय सामंत हे नेते कार्यकर्त्यांना मार्गदर्शन करणार आहेत.
राज्यात सध्या दुष्काळाची आणि शेतीच्या विविध समस्यांची चर्चा आहे. त्यामुळे या दोन्ही मेळाव्यांतून जनतेला काय दिलासा मिळणार आणि राजकीय पातळीवर एकमेकांवर काय टीका होणार, याकडे सर्वांच्या नजरा लागल्या आहेत. राज्यभरातून हजारो कार्यकर्ते या मेळाव्यांसाठी मुंबईत दाखल होत आहेत. दोन्ही गटांचे शक्तीप्रदर्शन पाहण्यासारखे असणार असून याकडे सर्वांच्या नजरा लागल्या आहेत.
