मुंबई : भारतीय क्रिकेट संघाचा धडाकेबाज फलंदाज रिंकू सिंग (Rinku Singh) याला अंडरवर्ल्डमधून धमकी देण्यात आली असल्याची धक्कादायक माहिती समोर आली आहे. धमकी देत क्रिकेटपटूकडून 5 कोटी रुपयांच्या खंडणीची मागणी देखील करण्यात आलीये.
मुंबई क्राइम ब्रांचने याबद्दल माहिती देताना सांगितले की, ‘रिंकू सिंगला ही धमकी दुसऱ्या कोणाकडूनही नसून मोस्ट वॉन्टेड गुंड दाऊद इब्राहिम टोळी म्हणजेच डी-कंपनीकडून देण्यात आली आहे. फेब्रुवारी ते एप्रिल 2025 दरम्यान रिंकूच्या प्रमोशनल टीमला तीन धमक्यांचे मेसेज पाठवण्यात आले होते. हे प्रकरण एका मोठ्या रॅकेटशी जोडलेले आहे. कारण झिशान सिद्दीकीला देखील अशाच प्रकारच्या धमकीचे ईमेल आले होते.’ या प्रकरणी आता दोघांना अटक केली असून, अटक केलेल्या आरोपींनी धमकी दिल्याचे कबूल केले आहे.
दरम्यान, अटक करण्यात आलेल्या आरोपींची नाव मोहम्मद दिलशाद आणि मोहम्मद नवीद, अशी असून, या दोघांना वेस्ट इंडिजमध्ये अटक करण्यात आली आहे. वेस्ट इंडिजने त्यांना 1 ऑगस्ट रोजी भारताच्या स्वाधीन केल्याचे वृत्त आहे.
