लोणी काळभोर, ता. 9: पुणे कृषी उत्पन्न बाजार समितीचे (Pune APMC) सभापती प्रकाश जगताप (Prakash Jagtap) हे मोजक्याच संचालकांना हाताशी धरून मनमानी पद्धतीने कारभार हाकत आहेत. बाजार समिती (Pune Agricultural Produce Market Committee) ही प्रकाश जगताप यांची जहागिरी नाही. असा खोचक टोला संचालक प्रशांत काळभोर (Prashant Kalbhor) यांनी लगावला आहे. तसेच बाजार समितीतील नियमबाह्य पद्धतीने केलेल्या गैरकारभाराचा लवकरच पर्दाफाश करणार असून, याबाबत राज्याचे मुख्यमंत्री देवेंद्र फडणवीस, उपमुख्यमंत्री तथा पुण्याचे पालकमंत्री अजित पवार व पणन मंत्री जयकुमार रावल यांना भेटून बाजार समितीत सुरू असलेल्या अनागोंदी कारभार व भ्रष्टाचारासंदर्भात माहिती देणार आहे. असे त्यांनी सांगितले आहे.
नियमांनुसार वार्षिक सर्व साधारण सभा घेण्यापूर्वी संचालक मंडळ सभा घेऊन त्यामध्ये वार्षिक सर्वसाधारण सभेची तारीख ठरवणे अपेक्षित होते. तसेच सभेमधील विषयावर चर्चा होणे आवश्यक असताना सभापती प्रकाश जगताप यांनी संचालक मंडळाला विश्वासात न घेता परस्पर वार्षिक सर्वसाधारण सभेची तारीख जाहीर केली.
संचालकांना वार्षिक सर्वसाधारण सभेमध्ये आल्यानंतर वार्षिक अहवाल देण्यात आला. ही सरळ सरळ त्यांची मनमानी आहे. तसेच अहवालावर फोटो छपाई करताना तालुक्यातील व बाजार समितीच्या कार्यक्षेत्रातील विद्यमान आमदार चेतन तुपे, आमदार बापूसाहेब पठारे यांचा विसर पडला आहे.
पूर परिस्थितीमुळे अडचणीत सापडलेल्या शेतकऱ्यांना मदत करण्यासाठी मुख्यमंत्री सहायता निधीला बाजार समितीच्या वतीने 50 लक्ष रुपये द्यावेत, असे मत संचालक रोहिदास उंद्रे यांनी वार्षिक सभेत मांडले होते. इतर ठिकाणी बाजार समितीच्या पैशाचा अपव्यय होत असताना, शेतकऱ्यांना भरघोस मदत देण्याऐवजी केवळ 25 लाख रुपयांचा निधी परस्पर दिला गेला. तसेच निधीचा चेक देताना कार्यक्षेत्रातील आमदार, पीडिसीसी बँकेचे संचालक, पॅनल प्रमुख, आधारस्तंभ व संचालक मंडळातील इतर सहकारी संचालकांना सोबत घेऊन चेक देणे आवश्यक होते.
दरम्यान, सभापती प्रकाश जगताप यांनी स्वतः श्रेय लाटण्यासाठी आणि पालकमंत्री अजितदादांसमोर आपली पाठ थोपटण्यासाठी कोणालाही सोबत न घेता स्वतः मदतीचा चेक देऊन आले आहेत. तसेच सभापती झाल्यावर दौंडचे आमदार राहुल कुल, राज्यमंत्री माधुरी मिसाळ यांची भेट घेऊन सत्कार करून घेतले. परंतु, मंत्रालयात मदतीचा चेक देताना त्यांनाही साधी कल्पना दिली नाही. तालुक्यामध्ये स्वतःची टिमकी मिरवण्यासाठी जाणीवपूर्वक मंत्री महोदय, आमदार व मान्यवर यांचा विसर पडल्याचे दाखवून दिले. त्यामुळे काम असेल तेव्हा आमदारांचे उंबरे झिझवायचे आणि काम झाल्यानंतर त्यांना ओळखसुद्धा द्यायची नाही. हे म्हणजे अंधारात कामे करून घ्यायचे आणि उजेडात स्वतःचा टेंभा मिरवायचा असे स्वार्थीपणाचे लक्षण आहे.
पुणे कृषी उत्पन्न बाजार समितीचा यशवंत सहकारी साखर कारखान्याचा जमीन खरेदीचा सामंजस्य करार (एम ओ यू) संचालक मंडळ सभे पुढे न घेता मोजक्याच संचालकांना हाताशी धरून करण्यात आला. बाजार समितीतील संचालकांना विश्वासात न घेता सभापतींचा मनमानी पद्धतीने कारभार सुरू आहे. मनमानी पद्धतीने बाजार समिती चालवणे व संचालक मंडळाला विश्वासात न घेता कारभार करणे हे प्रकाश जगताप यांनी थांबविले पाहिजे. अन्यथा या नियमबाह्य पद्धतीने केलेल्या गैरकारभाराचा लवकरच पर्दाफाश करणार आहे असा इशारा पुणे कृषी उत्पन्न बाजार समितीचे संचालक प्रशांत काळभोर यांनी दिला आहे.
प्रशांत काळभोर यांना उपसभापती होण्याची महत्वाकांक्षा असल्याने ते केवळ विरोधाला विरोध करायचा म्हणून वाटेल ते आरोप करत सुटले आहेत. मात्र या आरोपांमध्ये काहीही तथ्य नाही. मी गेल्या तीन महिन्यांपासून सभापती आहे. या आधी अडीच वर्षाचा कार्यकाळ पूर्ण झाला. या कालावधीमध्ये संबंधितांनी कधीही आवाज उठवला नाही. याउपर बाजार समितीमध्ये प्रत्येक महिन्याला मासिक मिटिंग होत असते. या मिटिंगसाठी प्रशांत काळभोर हे उपस्थित असतात. मिटिंगमध्ये घेतले जाणारे सर्व निर्णय हे बहुमताने मंजूर केले जातात. अतिवृष्टीमुळे नुकसानग्रस्त शेतकऱ्यांसाठी 25 लाखाचा निधी कार्योत्तर मंजुरीने दिला आहे. काळभोर यांनी केवळ आरोप करण्यापेक्षा ते पुराव्यानिशी सिद्ध करून दाखवावेत. त्यांनी केलेले सर्व आरोप हे बिनबुडाचे असून याला काडीचाही आधार नाही.
-प्रकाश जगताप (सभापती – कृषी उत्पन्न बाजार समिती पुणे)
