पुणे : अन्न आणि औषध प्रशासन (FDA) विभागाचे आयुक्त तुकाराम मुंढे यांच्या मार्गदर्शनाखाली सध्या ठिकठिकाणी कारवाईचा धडाका सुरू आहे.अशातच आता पिंपरी-चिंचवडमधील निगडी परिसरात असलेल्या प्रसिद्ध सावजी (सावली) हॉटेलमध्ये ग्राहकांच्या आरोग्याशी खेळ सुरू असल्याचा संतापजनक प्रकार समोर आला आहे.
समोर आलेल्या माहितीनुसार,प्रसिद्ध सावजी (सावली) हॉटेलमध्ये,ऑनलाईन ऑर्डर केलेल्या पावभाजीमध्ये एका ग्राहकाला चक्क जिवंत अळी सापडल्याने नागरिकांमधून तीव्र संताप व्यक्त केला जात आहे.’फ्रेंडशिप डे’निमित्त निगडीतील हॉटेल्समध्ये खवय्यांची मोठी गर्दी होती. एका ग्राहकाने मागवलेल्या पावभाजीचे चार ते पाच घास खाल्ल्यानंतर त्यात जिवंत अळी असल्याचे अचानक निदर्शनास आले. हा किळसवाणा प्रकार पाहताच उपस्थितांनी हॉटेलमधील अस्वच्छतेविरोधात जोरदार आवाज उठवला.
दुसरीकडे, ही अळी थेट पावभाजीत नसून सोबत दिलेल्या सलाडमध्ये असावी, असा बचाव हॉटेल व्यवस्थापनाकडून मांडण्यात आला. पिंपरी-चिंचवड शहरात जवळपास 2000 हॉटेल्स असून त्यांच्या अन्नाची गुणवत्ता तपासणे हे प्रशासनाचे काम आहे. मात्र, योग्य पाहणी होत नसल्यामुळेच नागरिकांचे आरोग्य धोक्यात येत असल्याचा आरोप केला जात आहे.
या घटनेनंतर संबंधित ग्राहकाने तात्काळ अन्न व औषध प्रशासनाकडे फोनवरून तक्रार नोंदवली. या तक्रारीची गंभीर दखल घेत एफडीएने प्रकरणाची सखोल चौकशी करून दोषींवर कडक कारवाई करण्याचे आश्वासन दिले आहे. या प्रकारामुळे शहरातील हॉटेलमधील स्वच्छता आणि खाद्यपदार्थांच्या दर्जावर पुन्हा एकदा मोठे प्रश्नचिन्ह निर्माण झाले आहे.
