पुणे : बारामती तालुक्यातील श्री सोमेश्वर सहकारी साखर कारखान्याच्या पंचवार्षिक निवडणुकीच्या तोंडावर राष्ट्रवादी काँग्रेस पक्षाने मोठा निर्णय घेतला आहे . राष्ट्रवादी काँग्रेस (अजित पवार गट) पक्षाने आपले ज्येष्ठ नेते आणि सोमेश्वर कारखान्याचे विद्यमान अध्यक्ष पुरुषोत्तम जगताप यांच्यावर निलंबनाची कारवाई केली आहे.
जगताप यांनी पक्षाच्या धोरणांविरुद्ध भूमिका घेत भाजपशी हातमिळवणी केली आणि निवडणुकीत स्वतःचे वेगळे पॅनल मैदानात उतरवले. या बंडखोरीनंतर राष्ट्रवादी काँग्रेसचे तालुकाध्यक्ष संदीप बांदल यांनी जगताप यांच्या तात्काळ निलंबनाची घोषणा केली. पक्षाचे विचार आणि शिस्त बाजूला ठेवून काम केल्यामुळेच ही कारवाई करण्यात आल्याचे बांदल यांनी स्पष्ट केले.
या संपूर्ण प्रकरणावर राष्ट्रवादी काँग्रेसचे युवा नेते जय पवार यांनीही तीव्र प्रतिक्रिया दिली. ही निवडणूक बिनविरोध झाली असती तर ती स्वर्गीय अजितदादांना खरी श्रद्धांजली ठरली असती, असे भावनिक मत त्यांनी व्यक्त केले. तसेच पुरुषोत्तम जगताप यांचे हे बंड आधीपासूनच ठरलेले होते आणि कारखाना ही कोणा एका व्यक्तीची संस्था नसून सर्वांना सोबत घेऊन चालवायची असते, असा टोलाही त्यांनी लगावला.
दरम्यान सोमेश्वर सहकारी साखर कारखान्याची निवडणूक अंतिम टप्प्यात पोहोचली असून सर्वच गटांकडून प्रचाराचा धडाका सुरू आहे. उमेदवार मतदारांच्या प्रत्यक्ष भेटीगाठींवर भर देत आहेत. मात्र, पुरुषोत्तम जगताप यांच्या बंडखोरीमुळे आणि पक्षाने केलेल्या या तडकाफडकी कारवाईमुळे बारामतीच्या राजकीय वर्तुळात चांगलीच खळबळ उडाली आहे.
