धाराशिव : जिल्ह्यातील कळंब-येरमाळा मार्गावरील हासेगाव शिवारात चारित्र्याच्या संशयावरून पतीनेच पत्नीची दगडाने ठेचून निघृण हत्या केल्याची धक्कादायक घटना घडली आहे. या अत्यंत संतापजनक प्रकरणाची सर्वात वेदनादायी बाब मनजे या अवघ्या 4 वर्षांच्या चिमुकल्यासमोरच त्याच्या आईचा क्रूरपणे बळी घेण्यात आला.
मिळालेल्या माहितीनुसार, सावकारगावचा रहिवासी असलेला गणेश शिवाजी टेकाळे हा बेरोजगार अभियंता नशेच्या आहारी गेला होता. त्याला पत्नी कोमल हिच्यावर सतत संशय असायचा. हत्येपूर्वी गणेशने पत्नीचा एक व्हिडिओ तयार करून नातेवाईकांना पाठवला होता, ज्यामुळे दोघांमधील वाद अधिक तीव्र झाला. बुधवारी सायंकाळी गणेश पत्नी व मुलाला दुचाकीवरून हासेगाव येथील शेतात घेऊन गेला. तिथे वाद विकोपाला गेल्यानंतर त्याने पत्नीला जबर मारहाण करत दगडाने ठेचून मारले.
पत्नीचा खून केल्यानंतर आरोपीने व्हॉट्सॲप स्टेटसवर “सा@# निकली बेवफा… सजा भी हमने ही दी… if any one after me … then meet me in samshaan” असा मजकूर ठेवून गुन्ह्याची कबुली दिली आणि घटनास्थळावरून पसार झाला. घटनेची माहिती मिळताच पोलिसांनी घटनास्थळी धाव घेतली. आईचा मृतदेह कुठे आहे, हे या घटनेचा एकमेव प्रत्यक्षदर्शी असलेल्या 4 वर्षांच्या बालकानेच पोलिसांना दाखवले.
पोलिसांनी फॉरेन्सिक टीमच्या मदतीने घटनास्थळावरून आवश्यक पुरावे जमा केले आहेत. आरोपीचा मोबाईल, व्हॉट्सॲप स्टेटस आणि व्हिडिओ डिजिटल पुरावे म्हणून तपासात समाविष्ट केले जात आहेत. संशयाचे भूत आणि नशेच्या आहारी गेलेल्या पतीने स्वतःचे कुटुंब उद्ध्वस्त करून चिमुकल्याला पोरके केले आहे. सध्या पोलीस फरार आरोपीचा शोध घेत असून पुढील तपास सुरू आहे.
