Pune Suicide Case: आता सहन होत नाही… वडिलांच्या ‘तसल्या’ त्रासाला कंटाळून पुण्यातील अल्पवयीन मुलीची आत्महत्या

मिळालेल्या माहितीनुसार, पुण्यातील नांदेड गाव येथील जिजाबाईनगर भागातील एका 17 वर्षीय विद्यार्थीनीने वडिलांच्या जाचाला कंटाळून आयुष्य संपवले आहे. संजीवनी जीवन रोडे (वय 17) असे आत्महत्या केलेल्या मुलीचे नाव आहे. मुलीने आत्महत्या केल्याप्रकरणी आईने पोलीस ठाण्यात तक्रार दिली. तक्रारीवरून, मुलीचे वडील जीवन गणपती रोडे (वय 45) यांच्याविरुद्ध नांदेड सिटी पोलीस ठाण्यात गुन्हा नोंदवण्यात आला आहे. गेल्या 10 वर्षांपासून रोडे कुटुंब जिजाईबाईनगर परिसरात वास्तवास आहे.

पोलिसांकडून मिळालेल्या माहितीप्रमाणे, मुलीच्या आईने जीवन रोडे यांच्याविरोधात गुन्हा दाखल केला. जीवन रोडे यांना दारूचे व्यसन असून ते मुलांना वारंवार अपमान, शिवीगाळ करत आणि त्रास देत असत. कुटुंबाचा खर्च शीला रोडे या घरकाम करून भागवत होत्या. 29 सप्टेंबर रोजीही त्या नेहमीप्रमाणे कामासाठी बाहेर गेल्या होत्या. घरात त्या वेळी जीवन रोडे आणि त्यांची 3 मुलं होती.

दुपारी संजीवनीची मोठी बहीण कामासाठी बाहेर गेली. त्यावेळी घरी संजीवनी, तिचा लहान भाऊ आणि वडील एवढीच मंडळी होती. सायंकाळी अंदाजे 5:30 वाजता शीला रोडे यांना मुलीने गळफास घेतल्याची माहिती फोनवरून मिळाली.

पोलिसांनी घटनास्थळी पाहणी केली असता, संजीवनीने आत्महत्या करण्यापूर्वी एक चिठ्ठी लिहली होती. ती पोलिसांनी ताब्यात घेतली. त्या चिठ्ठीत तिने वडिलांकडून होत असलेल्या सततच्या मानसिक जाचाला कंटाळून हे टोकाचे पाऊल उचलल्याचे स्पष्टपणे लिहले.

या घटनेनंतर परिसरात एकच खळबळ उडाली असून परिसरात शांतता पसरली आहे. नांदेड सिटी पोलिसांनी या प्रकरणाचा पुढील तपास सुरू केला आहे.