पुणे: राज्यात दहावी-बारावीच्या परीक्षा कॉपीमुक्त आणि (Pune SSC Paper Leak) तणावमुक्त वातावरणात पार पडाव्यात यासाठी राज्य माध्यमिक व उच्च माध्यमिक शिक्षण मंडळाकडून विविध उपाययोजना केल्या जात असतानाच पुण्यात दहावीच्या गणिताच्या प्रश्नपत्रिकेचा प्रकार समोर आल्याने शिक्षण क्षेत्रात मोठी खळबळ उडाली आहे. नागपुरातील पेपरफुटी प्रकरणाची चर्चा सुरू असतानाच पुण्यातही गणिताचा पेपर टेलिग्रामवर लीक झाल्याची बाब उघड झाल्याने परीक्षा व्यवस्थेवर प्रश्नचिन्ह निर्माण झाले आहे.
मिळालेल्या माहितीनुसार, दहावीच्या गणित विषयाच्या भाग-1 आणि भाग-2 या दोन्ही प्रश्नपत्रिका परीक्षा होण्यापूर्वीच एका टेलिग्राम ग्रुपवर प्रसारित झाल्याचे समोर आले आहे. विशेष म्हणजे गणित भाग-2 ची प्रश्नपत्रिका परीक्षा होण्याच्या तब्बल 3 दिवस आधीच या ग्रुपवर टाकण्यात आल्याचे तपासात आढळले आहे. ही माहिती समोर आल्यानंतर महाराष्ट्र राज्य माध्यमिक व उच्च माध्यमिक शिक्षण मंडळाने संबंधित प्रश्नपत्रिकांची अधिकृत प्रश्नपत्रिकेशी पडताळणी केली असता दोन्ही पेपर तंतोतंत जुळत असल्याचे स्पष्ट झाले.
या गंभीर प्रकारानंतर पुणे विभागीय शिक्षण मंडळाने तातडीने शिवाजीनगर पोलीस ठाण्यात तक्रार दाखल केली आहे. टेलिग्राम ग्रुपचा अॅडमिन आणि त्यातील काही सदस्यांविरोधात गुन्हा नोंद करण्यात आला असून पोलिसांनी या प्रकरणाचा तपास सुरू केला आहे. पोलिसांकडून डिजिटल पुरावे, मोबाईल डेटा आणि संबंधित ग्रुपचा तांत्रिक मागोवा घेतला जात आहे.
पुणे हे राज्यातील शिक्षणाचे प्रमुख केंद्र मानले जाते. त्यामुळे अशा ठिकाणी प्रश्नपत्रिका परीक्षा होण्यापूर्वीच सोशल मीडियावर प्रसारित झाल्याची घटना समोर आल्याने विद्यार्थी, पालक आणि शिक्षकांमध्ये चिंतेचे वातावरण निर्माण झाले आहे. परीक्षा प्रक्रियेची गोपनीयता आणि विश्वासार्हता टिकवणे हे शिक्षण मंडळासाठी मोठे आव्हान ठरत असल्याचे तज्ज्ञांचे मत आहे.
दरम्यान, प्रश्नपत्रिका नेमकी कुठून आणि कशी लीक झाली, त्यामागे कोणते जाळे कार्यरत आहे आणि यात कोणाचा सहभाग आहे, याचा तपास पोलिसांकडून सुरू आहे. या प्रकरणातील मुख्य सूत्रधार शोधून काढणे आणि भविष्यात अशा घटना टाळण्यासाठी कठोर पावले उचलणे हे तपास यंत्रणेसमोर मोठे आव्हान ठरणार आहे.
