Pune Police Action: पुणे: पुणे शहरासह परिसरात अलीकडच्या काळात गुन्हेगारी घटनांमध्ये दिवसेंदिवस वाढ होत आहे. कोयता हल्ले, मारहाण आणि खुनाच्या घटनांमुळे कायदा आणि सुव्यवस्थेचा प्रश्न ऐरणीवर आला आहे. काही दिवसांपूर्वी टोळीवादातून दोन तरुणांची हत्या झाल्याच्या घटनेनंतर पोलिसांकडून शहर व जिल्ह्यात कायदा सुव्यवस्था अबाधित राखण्यासाठी कडक उपाययोजना केल्या जात आहेत.
या पार्श्वभूमीवर सोशल मीडियावर गुन्हेगारीचे उदात्तीकरण करणारे, तरुणांना चिथावणी देणारे रील्स तयार करणाऱ्यांवर पोलिसांनी विशेष लक्ष केंद्रीत केले आहे. खडकी पोलिसांनी अशाच प्रकारे गुन्हेगारीला प्रोत्साहन देणारे व्हिडिओ तयार करणाऱ्या दोन तरुणांवर झटपट कारवाई केली आहे.
खडकी परिसरात या दोघांनी येरवडा जेल, गुन्हेगारी आणि दहशतीचा उल्लेख असलेले आक्षेपार्ह शब्द वापरून एक रील सोशल मीडियावर पोस्ट केली. या व्हिडिओमधील काही वेळातच मोठ्या प्रमाणात व्हायरल झाला. याची माहिती खडकी पोलिसांना मिळताच, तात्काळ हालचाली सुरू केल्या.
गुप्त बातमीदारांच्या आधारे पोलिसांनी संबंधित दोन्ही तरुणांना शोधून काढले आणि ताब्यात घेतले. त्यानंतर त्यांचे मुंडन करून त्यांना कॅमेऱ्यासमोर माफी मागण्यास भाग पाडण्यात आले. पोलिसांनी केलेल्या या कारवाईचा व्हिडिओदेखील नंतर सोशल मीडियावर प्रसारित करण्यात आला.
पुणे पोलिसांनी स्पष्ट केले आहे की, सोशल मीडियावर गुन्हेगारीचे समर्थन करणारे, दहशत निर्माण करणारे किंवा तरुणांना चुकीच्या मार्गाला लावणारे व्हिडिओ तयार करणाऱ्यांवर कठोर कारवाई केली जाईल. अशा प्रकारच्या कृत्यांचे व्हिडिओ प्रसारित केल्यावर पुणे पोलीस कडक कारवाई करेल अशी माहिती देखील दिली आहे.
