पिंपरी : पिंपरी-चिंचवड महापालिकेच्या करसंकलन विभागातील लिपिकाला १ लाख २० हजार रुपयांची लाच स्वीकारताना लाचलुचपत प्रतिबंधक विभागाने (ACB) रंगेहाथ पकडले. उमेश सुबराव कुटे (वय ३७, लिपिक, करसंकलन विभागीय कार्यालय, सांगवी, पिंपरी-चिंचवड महापालिका) असे अटक करण्यात आलेल्या आरोपीचे नाव आहे. मालमत्ता कराची रक्कम कमी करून देण्याच्या मोबदल्यात त्याने तक्रारदाराकडे लाचेची मागणी केल्याचा आरोप आहे.
तक्रारदाराने पिंपळे गुरव येथे एक गुंठा जागा खरेदी करून त्यावर तीन मजली इमारत बांधली आहे. या इमारतीची नवीन मालमत्ता कर आकारणी करण्यासाठी त्यांनी २० ऑगस्ट २०२६ रोजी पिंपरी-चिंचवड महापालिकेच्या कर आकारणी व करसंकलन विभागाच्या सांगवी विभागीय कार्यालयात अर्ज केला होता.
या अर्जाच्या अनुषंगाने आरोपी लिपिक उमेश कुटे याने तक्रारदाराशी संपर्क साधला. इमारतीचा वार्षिक मालमत्ता कर ९१ हजार ४७२ रुपये होणार असून, तो कमी करून ५० हजार रुपयांच्या आत करता येईल, असे त्याने सांगितल्याचा आरोप आहे. त्यासाठी कुटे याने सुरुवातीला १ लाख ५० हजार रुपयांची लाच मागितली. त्यानंतर तडजोडीनंतर १ लाख ३० हजार रुपये देण्याची मागणी केल्याचे तक्रारीत नमूद आहे.
तक्रारदाराने याबाबत २ सप्टेंबर रोजी पुणे लाचलुचपत प्रतिबंधक विभागाकडे तक्रार केली. तक्रारीची पडताळणी ३ सप्टेंबर रोजी करण्यात आली. यावेळी आरोपी उमेश कुटे याने पंचासमक्ष मालमत्ता कर कमी करून देण्यासाठी १ लाख ३० हजार रुपयांची मागणी केली. त्यानंतर तडजोडीअंती १ लाख २० हजार रुपये स्वीकारण्याची तयारी दर्शविल्याचे तपासात निष्पन्न झाले.
यानंतर ACBच्या पुणे युनिटने सापळा रचला. आनंदनगर, सांगवी येथील स्विमिंग टँक रोडवर दुपारी दोनच्या सुमारास तक्रारदाराकडून १ लाख २० हजार रुपयांची लाच स्वीकारताना उमेश कुटे याला पंचासमक्ष रंगेहाथ पकडण्यात आले. त्याला ३ सप्टेंबर रोजी दुपारी दोन वाजता ताब्यात घेण्यात आले आहे.
या प्रकरणी सांगवी पोलीस ठाणे, पिंपरी-चिंचवड आयुक्तालय येथे भ्रष्टाचार प्रतिबंध अधिनियम १९८८ मधील कलम ७ अन्वये गुन्हा दाखल करण्याची प्रक्रिया सुरू आहे.
ही कारवाई पोलीस अधीक्षक शिरीष सरदेशपांडे आणि अपर पोलीस अधीक्षक-१ अजित पाटील यांच्या मार्गदर्शनाखाली करण्यात आली. सापळा कारवाईचे नेतृत्व पोलीस निरीक्षक शैलजा शिंदे यांनी केले. पोलीस उपअधीक्षक सतीश वाळके हे पर्यवेक्षण अधिकारी होते. सापळा पथकात पोलीस कॉन्स्टेबल कैलास महामूलकर, पोलीस कॉन्स्टेबल अश्विन कुमकर आणि सहायक फौजदार अविनाश चव्हाण यांचा समावेश होता.
लाच मागणाऱ्या लोकसेवकांविरोधात तक्रार असल्यास नागरिकांनी लाचलुचपत प्रतिबंधक विभागाशी संपर्क साधावा, असे आवाहन करण्यात आले आहे.
