Pune News : पुणे : पुणे शहराला अंमली पदार्थांच्या विळख्यातून मुक्त करण्यासाठी पोलीस आयुक्तांनी दिलेल्या आदेशानुसार पुणे पोलिसांनी मोठी कारवाई केली आहे. परिमंडळ ७ च्या हद्दीत राबवलेल्या विशेष मोहिमेत पोलिसांनी सुमारे ४८ लाख ६६ हजार २५० रुपये किमतीचा मुद्देमाल जप्त केला असून, यामध्ये ‘राजस्थान’ कनेक्शन समोर आल्याने खळबळ उडाली आहे. Pune News
८ एप्रिल ते २३ एप्रिल दरम्यान पोलिसांनी अंमली पदार्थ विरोधी मोहिमेचा धडाका लावला होता. यामध्ये वाघोली, लोणीकंद, लोहेगाव विमानतळ, चंदननगर आणि खराडी यांसारख्या वर्दळीच्या आणि आयटी हब परिसरात विशेष पथकांनी छापे टाकले. या कारवाईत एम.डी. (मेफेड्रॉन) आणि गांजाची विक्री तसेच सेवन करणाऱ्यांविरोधात एनडीपीएस (NDPS) कायद्यांतर्गत एकूण १३ गुन्हे दाखल करण्यात आले आहेत. Pune News
पोलिसांनी या मोहिमेत ११ आरोपींना बेड्या ठोकल्या आहेत. अटक केलेल्या आरोपींची कसून चौकशी केली असता, काही आरोपी थेट राजस्थानमधून ‘एम.डी.’ महाराष्ट्रात आणत असल्याची धक्कादायक माहिती समोर आली. या माहितीच्या आधारे पुणे पोलिसांनी थेट राजस्थानपर्यंत जाऊन तपास यंत्रणा राबवली आहे. Pune News
या संपूर्ण कारवाईत पोलिसांनी सुमारे ४८,६६,२५० रुपये किंमतीचा मुद्देमाल जप्त केला आहे. यात २६८.११ ग्रॅम एम.डी., ४८२ ग्रॅम गांजा आणि २६० ग्रॅम पावडर (एम.डी. मिश्रित पदार्थ) यांचा समावेश आहे. Pune News
पुणे पोलिसांनी या कारवाईद्वारे अंमली पदार्थ विक्रेत्यांचे कंबरडे मोडले आहे. शहरात ड्रग्ज विक्री करणाऱ्यांची माहिती मिळाल्यास नागरिकांनी तातडीने पोलिसांशी संपर्क साधावा, असे आवाहन पोलीस प्रशासनाकडून करण्यात आले आहे. या प्रकरणाचा पुढील तपास पोलीस अधिक वेगाने करत असून राजस्थानमधील मुख्य सूत्रधारांपर्यंत पोहोचण्याचे आव्हान आता पोलिसांसमोर आहे. Pune News
