Pune Leopard: पुणे : जुन्नर परिसरात बिबट्यांच्या दहशतीमुळे पुन्हा एकदा खळबळ उडाली आहे. बिबट्यामुळे वनविभागाने काही नियमांचे पालन करण्यास सांगितले आहे. रात्रीच्या वेळी बिबटे शिकारीसाठी फिरत असल्याने शक्यता जास्त आहे अशी सुचना देखील वनविभागाने दिल्या होत्या. अंधारात एकटे बाहेर पडून नका, असं सांगून सुध्दा एका तरुणाने बाहेर फिरण्याचं धाडस केल आणि याच कृत्यामुळे बिबट्याने त्याच्यावर झडप घातली. (Leopard Attack)
ही घटना पुणे जिल्ह्यातील नारायणगाव जुन्नर रस्त्यालगत सकर नगरी या सोसायटीमध्ये घडली. तनिष नवनाथ परदेशी वय 18 हा तरुण रात्री सुमारे 8.15 च्या सुमारास बाहेर उभा राहून फोनवर बोलत होता. परिसर अंधारात असल्याने त्याला जवळ येणारा बिबट्या दिसला नाही. अचानक दबा धरून बसलेल्या बिबट्याने त्याच्यावर झडप घातली.
या हल्ल्यात बिबट्याच्या नखांचे ओरखडे तनिषच्या पोटरीवर उमटले आणि तो जखमी झाला. सुदैवाने त्याचा जीव बचावला. कुटुंबीयांनी तत्काळ त्याला नारायणगाव ग्रामीण रुग्णालयात दाखल केले असून त्याची प्रकृती सध्या स्थिर असल्याचे सांगण्यात येते. या घटनेनंतर परिसरात एकच खळबळ उडाली आहे.
अंधारात चालताना किंवा फोनवर बोलत उभे राहताना बिबट्यांचा धोका वाढू शकतो, असे वनविभागाकडून सांगण्यात येत आहे. जुन्नर विभागात गेल्या काही दिवसांत बिबट्यांच्या हालचाली वाढल्याने नागरिकांना सतर्क राहण्याचे आवाहन करण्यात आले आहे.
