प्रतिनिधी अमित मुंडीक
Pune Crime : पुणे शहर गुन्हे शाखेच्या युनिट २ ने सराईत गुन्हेगाराकडून बेकायदेशीर अग्निशस्त्र जप्त करून मोठी कारवाई केली आहे. या कारवाईत 40 हजार 800 रुपये किमतीचे एक पिस्टल व एक जिवंत काडतूस जप्त करण्यात आले आहे.
दिनांक 03 जानेवारी 2026 रोजी गुन्हे शाखा युनिट २ कडील पोलीस अधिकारी व अंमलदार गुन्हे प्रतिबंधक गस्त व पेट्रोलिंग करत असताना, बातमीदारामार्फत माहिती मिळाली की मार्केट यार्ड परिसरातील गुरांचा बाजार येथे एक संशयित इसम बेकायदेशीरपणे अग्निशस्त्र बाळगून फिरत आहे. ही गोपनीय माहिती युनिट २ प्रभारी वरिष्ठ पोलीस निरीक्षक संतोष सोनवणे यांना कळवण्यात आली, त्यानंतर त्यांनी तात्काळ कायदेशीर कारवाईचे आदेश दिले. (Pune Crime)
त्यानुसार पोलीस पथकाने सापळा रचून प्रथमेश सुरेश पवार (वय 19, रा. संजयनगर, बिबवेवाडी, पुणे) याला ताब्यात घेतले. झडतीदरम्यान त्याच्याकडून मॅगझीनसह एक लोखंडी पिस्टल व एक जिवंत काडतूस असा एकूण 40,800 रुपयांचा मुद्देमाल जप्त करण्यात आला.
या प्रकरणी मार्केट यार्ड पोलीस स्टेशन येथे गुन्हा रजिस्टर क्रमांक 02/2026 शस्त्र अधिनियम कलम 3(25) तसेच महाराष्ट्र पोलीस अधिनियम कलम 37(1)(3) सह 135 अन्वये गुन्हा दाखल करण्यात आला असून आरोपीस अटक करण्यात आली आहे. सदर आरोपीवर यापूर्वी बिबवेवाडी पोलीस स्टेशन येथे शस्त्र अधिनियमान्वये गुन्हा दाखल असल्याची माहिती आहे. पुढील तपास सुरू आहे.
ही कारवाई अपर पोलीस आयुक्त (गुन्हे) पंकज देशमुख, पोलीस उप आयुक्त (गुन्हे) निखिल पिंगळे व सहायक पोलीस आयुक्त विजय कुंभार यांच्या मार्गदर्शनाखाली करण्यात आली
