Pune Crime : पुणे : देशातील गाजलेल्या आणि रहस्यमय गुन्हेगारी प्रकरणांमध्ये सनम हसन प्रकरणाचा अनेकदा उल्लेख केला जातो. 19 वर्षांच्या एका तरुणीचा वाढदिवसाच्या रात्री अचानक मृत्यू झाला आणि त्यानंतर सुरू झालेल्या तपासामुळे अनेक प्रश्न निर्माण झाले. या प्रकरणातील काही तपशील समोर आल्यानंतर तपास यंत्रणांनाही मोठे आव्हान उभे राहिले.
सनम हसन ही मूळची मुंबईची असून ती पुण्यात फॅशन डिझाईनिंगचे शिक्षण घेत होती. 3 ऑक्टोबर 2012 रोजी तिचा वाढदिवस होता. त्या निमित्ताने मित्रांसोबत पुण्यातील एका अपार्टमेंटमध्ये छोटेखानी पार्टी आयोजित करण्यात आली होती. मात्र दुसऱ्या दिवशी पहाटे तिची तब्येत बिघडल्याची माहिती कुटुंबीयांना देण्यात आली. पालक पुण्यात पोहोचेपर्यंत सनमचा मृत्यू झाल्याचे सांगण्यात आले.
सनमच्या मृत्यूनंतर तिच्या शरीरावर आढळलेले सीमेनचे नमुने आणि चार इंजेक्शनच्या खुणांमुळे, तिच्यावर लैंगिक अत्याचार करून हत्या करण्यात आल्याचा दाट संशय व्यक्त झाला. या प्रकरणाच्या तपासासाठी त्या रात्री पार्टीत उपस्थित असलेल्या १७ जणांची डीएनए (DNA) चाचणी करण्यात आली; मात्र धक्कादायक बाब म्हणजे, कोणाचेही नमुने मॅच झाले नाहीत. तपासादरम्यान असाही दावा करण्यात आला की, ससून रुग्णालयातील कर्मचाऱ्यांच्या निष्काळजीपणामुळे किंवा जाणीवपूर्वक केलेल्या कृत्यामुळे फॉरेन्सिक नमुन्यांमधील ‘हृदयांची’ अदलाबदल झाली असावी. परिणामी, पुरावा म्हणून सादर करण्यात आलेले ते हृदय नेमके कोणाचे होते, याचे गूढ आजही कायम असून या प्रकरणातील तपासावर प्रश्नचिन्ह उभे राहिले आहे.
नंतर तपासात काही वैद्यकीय प्रक्रियांमधील गोंधळामुळे काही नमुन्यांबाबत संभ्रम निर्माण झाल्याची शक्यता व्यक्त करण्यात आली. 2014 मध्ये हे प्रकरण केंद्रीय तपास संस्थेकडे सोपवण्यात आले. 2016 मध्ये पुढील तपासासाठी मृतदेह पुन्हा बाहेर काढून तपासणीही करण्यात आली. मात्र पुरावे अपुरे असल्याने या प्रकरणातील अनेक प्रश्न आजही अनुत्तरितच आहेत. सनम हसनचा मृत्यू नेमका कशामुळे झाला, याबाबत अजूनही स्पष्ट निष्कर्ष समोर आलेला नाही.
