Pune Airport : पुणे, ता. 18 : पुणे शहरात अवैधरित्या वास्तव्यास असलेल्या बांगलादेशी नागरिकांविरोधातील कारवाईला वेग आला असून, पुणे विमानतळावरून गुवाहाटी (आसाम) येथे पळून जाण्याच्या तयारीत असलेल्या दोन बांगलादेशी महिलांसह एका अल्पवयीन मुलाला खडक पोलिसांनी विमानतळ पोलिसांच्या मदतीने ताब्यात घेतले आहे. या कारवाईमुळे सुरक्षा यंत्रणांमध्ये खळबळ उडाली आहे. Pune Airport
शाहीनूर बेगम शेख (वय ४२), शागुरिका बेगम युलिया शेख (वय २८) आणि टोपू ऊर्फ मुराद अहमद शेख (वय १६ वर्षे ९ महिने) अशी ताब्यात घेण्यात आलेल्या संशयितांची नावे आहेत. प्राथमिक चौकशीत हे तिघेही बांगलादेशातील बिगाराट जिल्ह्यातील रहिवासी असल्याचे समोर आले आहे. Pune Airport
पोलिस आयुक्त अमितेश कुमार यांनी पुणे शहरात अवैधरीत्या राहणाऱ्या बांगलादेशी नागरिकांविरोधात विशेष मोहीम सुरू केली आहे. त्यानुसार परिमंडळ १ चे पोलिस उपायुक्त कृषिकेश रावले यांना गुप्त बातमीदारामार्फत माहिती मिळाली होती की, दोन महिला आणि एक युवक पुणे विमानतळावरून गुवाहाटीकडे रवाना होणार आहेत. Pune Airport
माहिती मिळताच खडक पोलिस ठाण्याचे वरिष्ठ पोलिस निरीक्षक शशिकांत चव्हाण यांनी तपास पथकाला तातडीने विमानतळावर पाठवले. विमानतळ पोलिस ठाण्याचे अधिकारी पालवे, सीआयएसएफचे अधिकारी संतोषकुमार अग्निहोत्री आणि त्यांच्या पथकाच्या मदतीने विमानतळ परिसरात सापळा रचण्यात आला. संशयास्पद हालचाली आढळल्यानंतर तिघांना ताब्यात घेण्यात आले. Pune Airport
चौकशीदरम्यान त्यांनी सोलापूरहून पुण्यात आल्याची तसेच पुण्याहून गुवाहाटीकडे जाण्याची तयारी सुरू असल्याची माहिती पोलिसांना दिली. पुढील चौकशी आणि कायदेशीर कारवाईसाठी तिघांना विमाननगर पोलिसांच्या ताब्यात देण्यात आले आहे. Pune Airport
दरम्यान, गेल्या दहा महिन्यांत परिमंडळ १ क्षेत्रातून तब्बल ९७ बांगलादेशी नागरिकांना ताब्यात घेण्यात आल्याची माहिती पोलिस उपायुक्त कृषिकेश रावले यांनी दिली. ही कारवाई पोलिस आयुक्त अमितेश कुमार, सहपोलिस आयुक्त रंजनकुमार शर्मा, अपर पोलिस आयुक्त राजेश बनसोडे, उपायुक्त कृषिकेश रावले आणि सहाय्यक पोलिस आयुक्त अनुजा देशमाने यांच्या मार्गदर्शनाखाली करण्यात आली. Pune Airport
