Pune News : पुणे, ता. 18 : देवी शक्तीचा संचार असल्याचा बनाव करून महिलांवर लैंगिक अत्याचार केल्याच्या गंभीर आरोपांमध्ये अटकेत असलेल्या भोंदू ऋषिकेश वैद्य याला न्यायालयाकडून मोठा धक्का बसला आहे. अतिरिक्त सत्र न्यायाधीश डी. पी. रागीट यांनी वैद्यचा जामीन अर्ज फेटाळून लावत गुन्ह्याचे गांभीर्य आणि प्रकरणातील परिस्थिती लक्षात घेता आरोपी जामिनासाठी पात्र नसल्याचे स्पष्ट केले. Pune News
सध्या न्यायालयीन कोठडीत असलेल्या ऋषिकेश वैद्य याने जामिनासाठी अर्ज दाखल केला होता. मात्र सरकारी पक्षाकडून ॲड. लीना पाठक तसेच फिर्यादीच्या वतीने ॲड. रोहन नहार यांनी जोरदार विरोध केला. त्यांना ॲड. ओंकार फडतरे, ॲड. गायत्री पोटवडे आणि ॲड. चैतन्य अभंग यांनी सहकार्य केले. Pune News
सरकारी पक्षाने न्यायालयात युक्तिवाद करताना सांगितले की, आरोपीने धार्मिक गुरू म्हणून निर्माण झालेल्या विश्वासाचा गैरफायदा घेत पीडित महिलेला जाळ्यात ओढले आणि तिच्यावर अत्याचार केला. प्रकरणाचा तपास अद्याप सुरू असून दोषारोपपत्र दाखल झालेले नाही. अशा परिस्थितीत आरोपीला जामीन दिल्यास तो साक्षीदारांवर दबाव टाकू शकतो किंवा पुरावे प्रभावित करू शकतो, अशी भीतीही व्यक्त करण्यात आली. Pune News
दोन्ही बाजूंचा युक्तिवाद ऐकल्यानंतर न्यायालयाने गुन्ह्याचे स्वरूप अत्यंत गंभीर असल्याचे नमूद करत आरोपीला जामीन देण्यास नकार दिला. “जामीन मिळण्यासाठी आवश्यक असलेला प्रथमदर्शनी आधार आरोपी सिद्ध करू शकलेला नाही,” असे निरीक्षण न्यायालयाने आदेशात नोंदवले. Pune News
दरम्यान, डिसेंबर २०२३ ते ११ मे २०२५ या कालावधीत हा प्रकार घडल्याचे तपासात समोर आले आहे. २७ मार्च २०२६ रोजी हडपसर पोलीस ठाण्यात या संदर्भात गुन्हा दाखल करण्यात आला होता. त्यानंतर २८ मार्च रोजी पोलिसांनी ऋषिकेश वैद्यला अटक केली होती. Pune News
तपासात समोर आलेल्या माहितीनुसार, सोशल मीडियाच्या माध्यमातून पीडित महिलेशी ओळख करून आरोपीने “मी देवाचा भक्त असून तुला विशेष उपासना शिकवतो,” असे सांगत तिचा विश्वास संपादन केला. त्यानंतर धार्मिक विधी आणि देवी शक्तीच्या नावाखाली तिच्यावर अत्याचार केल्याचा आरोप आहे. Pune News
नाशिकमधील कॅप्टन अशोक खरात प्रकरण राज्यभर गाजत असतानाच पुण्यात उघडकीस आलेल्या या प्रकरणामुळे मोठी खळबळ उडाली होती. आता न्यायालयाने जामीन नाकारल्याने आरोपीच्या अडचणी आणखी वाढल्या आहेत. Pune News
