Pune Murder Case पुणे, ता. 18 : पुण्यातील सिंहगड रस्ता परिसर रविवारी रात्री रक्तरंजित हत्याकांडाने हादरला. अनैतिक संबंधाच्या संशयातून एका ४१ वर्षीय तरुणावर धारदार शस्त्राने सपासप वार करून त्याची निर्घृण हत्या करण्यात आल्याची धक्कादायक घटना वडगाव बुद्रुक परिसरात घडली. या घटनेनंतर परिसरात भीती आणि तणावाचे वातावरण निर्माण झाले असून, आरोपी फरार झाला आहे. Pune Murder Case
रूपेश सुरेश भांदिर्गे (वय ४१, रा. स्पंदन बिल्डिंग, नऱ्हे) असे खून झालेल्या तरुणाचे नाव आहे. याप्रकरणी युवराज गेजगे (रा. रेणुकानगरी, वडगाव बुद्रुक) याच्याविरुद्ध सिंहगड रस्ता पोलीस ठाण्यात खुनाचा गुन्हा दाखल करण्यात आला आहे. मृत रूपेश याचा भाऊ नीलेश भांदिर्गे यांनी पोलिसांकडे फिर्याद दिली आहे. Pune Murder Case
पोलिसांनी दिलेल्या माहितीनुसार, आरोपी युवराज गेजगे याच्या नात्यातील एका महिलेशी रूपेशचे अनैतिक संबंध असल्याचा संशय आरोपीला होता. या कारणावरून दोघांमध्ये मागील काही दिवसांपासून वाद सुरू होते. रविवारी (ता. १७) रात्री दहाच्या सुमारास रूपेश वडगाव बुद्रुक परिसरात थांबला असताना आरोपी तेथे आला. सुरुवातीला दोघांमध्ये जोरदार वादावादी झाली. त्यानंतर संतापाच्या भरात आरोपीने रूपेशवर धारदार शस्त्राने सपासप वार केले. Pune Murder Case
हल्ला इतका भीषण होता की रूपेश रक्ताच्या थारोळ्यात कोसळला. परिसरातील नागरिकांनी आरडाओरडा ऐकून घटनास्थळी धाव घेतली. मात्र आरोपी तेव्हाच घटनास्थळावरून पसार झाला होता. घटनेची माहिती मिळताच सिंहगड रस्ता पोलिसांनी तातडीने घटनास्थळी धाव घेत जखमी रूपेशला रुग्णालयात दाखल केले. मात्र उपचारांपूर्वीच डॉक्टरांनी त्याला मृत घोषित केले.
या हत्याकांडामुळे परिसरात मोठी खळबळ उडाली असून, आरोपीला अटक करण्यासाठी पोलिसांनी विशेष पथके रवाना केली आहेत. पोलिसांकडून परिसरातील सीसीटीव्ही फुटेजची तपासणी सुरू असून, आरोपीचा शोध युद्धपातळीवर घेतला जात आहे. दरम्यान, पुण्यात दिवसेंदिवस वाढणाऱ्या गुन्हेगारी घटनांमुळे नागरिकांमध्ये भीतीचे वातावरण निर्माण झाले आहे. पुढील तपास सहायक पोलीस निरीक्षक समीर करपे करत आहेत. Pune Murder Case
