फुरसुंगी, ता. 16: फुरसुंगी (Phursungi News) उरुळी देवाची नगरपरिषदेच्या निवडणुकीची रणधुमाळी सर्वत्र चालू असताना, मतदारांचा कौल आपल्या बाजूने वळविण्यासाठी एका उमेदवाराच्या मुलाने मतदारांना दारू वाटप करत असल्याचे निवडणूक आयोगाच्या स्थिर सर्वेक्षण पथकाने पडकले आहे. ही कारवाई फुरसुंगी (ता. हवेली) ग्रामपंचायत हद्दीतील शिवम हॉस्पिटलजवळ सोमवारी (ता.15) रात्री साडेअकरा वाजण्याच्या सुमारास घडली आहे. या प्रकरणी फुरसुंगी पोलीस ठाण्यात दोघांवर गुन्हा दाखल करण्यास आला असून चारचाकी गाडीसह सुमारे 7 लाख रुपयांचा मुद्देमाल जप्त करण्यात आला आहे.
वेदांत राहुल कामठे (वय 19 रा. पांडवदंड, फुरसुंगी, पुणे) व आकाश तुकाराम मुंडे (वय 24 रा. शिवम हॉस्पिटल शेजारी, तरवडी फुरसुंगी, पुणे) अशी गुन्हा दाखल करण्यात आलेल्यांची नावे आहेत. याप्रकरणी सुहास रामचंद्र गवळी (वय 36, रा. फुरसुंगी, पुणे) यांनी फुरसुंगी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी सुहास गवळी हे प्रज्ञा प्राथमिक विद्यालय आदर्शनगर येथे नोकरी करतात. त्यांची निवडणूक आयोगाच्या स्थिर सर्वेक्षण पथकात नेमणूक करण्यात आली आहे. हे पथक निवडणुकीदरम्यान उमेदवारांच्या खर्चावर आणि निवडणूक आचारसंहितेच्या उल्लंघनावर लक्ष ठेवण्यासाठी कायमस्वरूपी एकाच ठिकाणी (उदा. चेकपोस्ट किंवा महत्त्वाच्या चौकात) बसून काम करते. स्थिर सर्वेक्षण पथक हे व्हिडीओ आणि फोटोद्वारे पुरावे गोळा करतात आणि भरारी पथकासोबत मिळून आचारसंहितेची अंमलबजावणी सुनिश्चित करतात.
सुहास गवळी यांची शिवम हॉस्पिटलजवळ असलेल्या चेकपोस्ट नेमणूक करण्यात आली आहे. ते सोमवारी रात्री साडेअकरा वाजण्याच्या सुमारास कर्तव्य बजावीत होते. तेव्हा पुणे-सोलापुर महामार्गावरून फुरसुंगी या ठिकाणी जात असलेली एक टाटा नेक्सॉन ई व्ही क्रमांक (एम. एच. 12 वाय. एल. 7173) हि चारचाकी गाडी एस. एस. टी पॉईंट जवळील रोडने चालवत जात होती. तेव्हा या गाडीची तपासणी केली असता, गाडीच्या डिकीमध्ये रॉयल स्टॅगसह विदेशी दारुच्या बाटल्या मिळुन आल्या आहेत.
दरम्यान, गाडीतील वेदांत कामठे व आकाश तुकाराम मुंडे यांच्याकडे दारूच्या संदर्भात अधिक विचारणा केली असता, त्यांनी समाधानकारक उत्तर दिले नाही. दोन्ही इसमांनी अवैधकरित्या दारू बाळगून त्यांची वाहतूक करीत असल्याचे निदर्शनास आल्यानंतर या घटनेची माहिती फुरसुंगी पोलिसांना देण्यात आली.
या घटनेची माहिती मिळताच, फुरसुंगी पोलीस त्वरित घटनास्थळी दाखल झाले. पोलिसांनी दारूसह कार असा सुमारे 7 लाख रुपयांचा मुद्देमाल जप्त केला आहे. तर दोन्ही आरोपींच्या विरोधात महाराष्ट्र दारुबंदी अधिनियम 65 (अ) (ई) प्रमाणे गुन्हा दाखल करण्यात आला आहे. पुढील तपास फुरसुंगी पोलीस ठाण्याचे पोलीस हवालदार करपे करत आहेत.
