Paud News पौड, ता. ७ : मुळशी तालुक्यातील मांडवखडक (वेगरे) परिसरात १९ वर्षीय मतिमंद व अपंग तरुणीवर अत्याचार करून फरार झालेल्या नराधमाला पौड पोलिसांनी अवघ्या काही दिवसांत शोधून काढत बेड्या ठोकल्या आहेत. डोंगराळ भागात लपून बसलेल्या आरोपीचा पोलिसांनी थरारक पाठलाग करत पवनानगर परिसरातून ताबा घेतल्याने पोलीस यंत्रणेच्या कामगिरीचे कौतुक होत आहे. Paud News
या प्रकरणी गजानन भागू पवार (वय २६, रा. मांडवखडक वेगरे, ता. मुळशी) याला अटक करण्यात आली आहे. पीडित तरुणी ही मतिमंद व शारीरिकदृष्ट्या अपंग असल्याने या घटनेमुळे परिसरात संतापाची लाट उसळली आहे. Paud News
मिळालेल्या माहितीनुसार, दिनांक २३ एप्रिल २०२६ रोजी दुपारी साडेएकच्या सुमारास पीडित तरुणी घरात एकटी असल्याची संधी साधून शेजारी राहणाऱ्या आरोपी गजानन पवार याने तिच्यावर जबरदस्तीने अत्याचार केला. घटनेनंतर आरोपी फरार झाला होता. याप्रकरणी पौड पोलीस ठाण्यात भारतीय न्याय संहिता कलम ६४, ६४(१), ६४(२)(i)(k) आणि ३५१ अंतर्गत गुन्हा नोंद करण्यात आला आहे.
या घटनेचे गांभीर्य लक्षात घेत वरिष्ठ पोलीस निरीक्षक संतोष गिरीगोसावी यांनी तात्काळ तपास पथके तयार केली. आरोपी हा कातकरी समाजातील असून डोंगराळ भागात वास्तव्य करणारा असल्याने त्याचा शोध घेणे पोलिसांसाठी मोठे आव्हान होते. तरीही पोलिसांनी आरोपीचे नातेवाईक, त्याची हालचाल आणि तो काम करत असलेल्या ठिकाणांची माहिती गोळा करत तपासाची व्याप्ती वाढवली.
दरम्यान, आरोपी लोणावळा ग्रामीण पोलीस हद्दीतील पवनानगर येथे लपल्याची माहिती पोलिसांना मिळाली. त्यानुसार विशेष पथकाने सापळा रचून आरोपीला ताब्यात घेतले. या कारवाईत लोणावळा ग्रामीण पोलिसांचीदेखील मदत घेण्यात आली. Paud News
सध्या आरोपीला अटक करण्यात आली असून पुढील तपास सुरू आहे. “महिला आणि बालकांवरील अत्याचाराच्या घटनांमध्ये पोलीस प्रशासन अत्यंत संवेदनशील असून अशा गुन्ह्यांतील आरोपींना कोणत्याही परिस्थितीत सोडले जाणार नाही,” असा इशारा वरिष्ठ पोलीस निरीक्षक संतोष गिरीगोसावी यांनी दिला.
