पुणे : पुणे महानगरपालिका क्षेत्रातील सर्व सरकारी आणि खाजगी प्राथमिक शाळांच्या वेळेत 31 ऑगस्ट 2026 पर्यंत तात्पुरता बदल करण्यात आला आहे. भारत निवडणूक आयोगाने देशभरात सुरू केलेल्या मतदार याद्यांच्या विशेष पुनरीक्षण मोहिमेमुळे हा निर्णय घेण्यात आला आहे. पुणे पालिकेच्या प्राथमिक शिक्षण विभागाने यासंदर्भातील अधिकृत परिपत्रक प्रसिद्ध केले असून, त्यानुसार आता शाळा सकाळी 7.00 वाजता सुरू होऊन दुपारी 12.15 वाजता सुटतील.
हा निर्णय 1जुलै ते 31 ऑगस्ट 2026 या कालावधीसाठी लागू राहणार असून मनपाच्या तसेच खाजगी प्राथमिक शाळानांही तो लागू असणार आहे. दरम्यान निवडणुकीच्या या विशेष मोहिमेसाठी अनेक प्राथमिक शिक्षकांना मतदान केंद्रस्तरीय अधिकारी म्हणून जबाबदारी देण्यात आली आहे. शिक्षकांना शाळेचे अध्यापन सांभाळून निवडणूक विभागाची कामेही वेळेत पूर्ण करता यावीत, यासाठी हा सुवर्णमध्य काढण्यात आला आहे. सकाळच्या सत्रात शाळा संपल्यानंतर शिक्षकांना दुपारच्या वेळेत मतदार नोंदणी, नाव पडताळणी आणि इतर प्रशासकीय कामे करण्यासाठी पुरेसा वेळ मिळणार आहे.
शाळांच्या या नवीन वेळापत्रकामुळे विद्यार्थ्यांच्या दैनंदिन अभ्यासावर आणि शिक्षण प्रक्रियेवर कोणताही नकारात्मक परिणाम होणार नाही, अशी ग्वाही प्रशासनाने दिली आहे.पुणे पालिकेच्या प्राथमिक शिक्षण विभागाच्या प्रशासकीय अधिकारी सुनंदा वाखारे यांनी शहरातील सर्व शाळांच्या मुख्याध्यापकांना या नव्या नियमाची तातडीने अंमलबजावणी करण्याचे आदेश दिले आहेत.
शाळेच्या अचानक झालेल्या या बदलामुळे विद्यार्थ्यांची किंवा पालकांची धांदल उडू नये, म्हणून पालकांना या वेळेची माहिती त्वरित देण्याच्या सूचना करण्यात आल्या आहेत. शाळांनी आपल्या स्तरावर पालक-शिक्षक संघ , व्हॉट्सॲप ग्रुप आणि नोटीस बोर्डाच्या माध्यमातून या नवीन वेळापत्रकाची व्यापक प्रसिद्धी करावी, जेणेकरून पालकांना सकाळच्या नियोजनासाठी पुरेसा वेळ मिळेल.,असे आदेश दिले आहेत
