पुणे : पुणे शहरातील नागरिकांसाठी महत्त्वाची सूचना आहे. विविध जलशुद्धीकरण केंद्रे आणि पाणीपुरवठा यंत्रणेतील देखभाल-दुरुस्तीची कामे हाती घेण्यात आली आहेत. त्यामुळे 10 सप्टेंबर रोजी शहरातील अनेक भागांमध्ये पाणीपुरवठा बंद ठेवण्यात येणार आहे. त्यानंतर 11 सप्टेंबरला सकाळी उशिरा आणि कमी दाबाने पाणी येण्याची शक्यता आहे.
पर्वती जलशुद्धीकरण केंद्रातील एचएलआर टाकीच्या कामामुळे सहकारनगर, पद्मावती, बिबवेवाडी, मुकुंदनगर, महर्षीनगर, शिवतेजनगर, इंदिरानगर, गंगाधाम, चिंतामणीनगर, लेक टाऊन, प्रेमनगर, सॅलेसबरी पार्क, पर्वती गावठाण, भाग्योदयनगर, कोंढवा खुर्द आणि जनता वसाहत परिसर प्रभावित होणार आहेत.
एसएनडीटी जलकेंद्राच्या देखभाल कामामुळे गोखलेनगर, औंध, बोपोडी, पुणे विद्यापीठ परिसर, विधी महाविद्यालय रस्ता, सेनापती बापट रस्ता, भांडारकर रस्ता, प्रभात रस्ता, पौड रस्ता, मयूर कॉलनी, कर्वे रस्ता तसेच वारजेच्या काही भागात पाणीपुरवठा खंडित राहील.
भामा आसखेड जलकेंद्राच्या कामाचा परिणाम कळस-धानोरी, लोहगाव, टिंगरेनगर, विमाननगर, वडगावशेरी, कल्याणीनगर, विश्रांतवाडी, फुलेनगर, येरवडा आणि खराडी भागावर होणार आहे. आळंदी नगर परिषद आणि आसपासच्या परिसरातही पाणीपुरवठा बंद राहणार आहे. पॅनकार्ड क्लब जीएसआर टाकीअंतर्गत बाणेर, बालेवाडी, बाणेर गावठाण, पॅनकार्ड क्लब रोड, पल्लोड फार्म आणि मेडिपॉईंट रस्ता या भागांमध्ये पाणीपुरवठ्यावर परिणाम होईल.
दरम्यान, वारजे जलकेंद्रालगतच्या टाकीच्या कामामुळे कर्वेनगर, शाहू कॉलनी, इंगळेनगर, वारजे जकात नाका आणि परिसर प्रभावित होणार आहे. चांदणी चौक टाकीच्या कामामुळे पाषाण, बावधन, भुसारी कॉलनी, सोमेश्वरवाडी, सुतारवाडी, सुस रोड, भूगाव रोड, गांधी भवन, वारजे माळवाडी, काकडे सिटी आणि कोथरूड परिसरात पाणीपुरवठा बंद राहणार आहे. नागरिकांनी 10 सप्टेंबरपूर्वी आवश्यक पाणीसाठा करून ठेवावा आणि 11 सप्टेंबरला पाणीपुरवठा सुरळीत होईपर्यंत पाण्याचा जपून वापर करावा.
