पुणे: नळ स्टॉप ते माणिकबाग या प्रस्तावित मेट्रो मार्गाच्या कामाला आता लवकरच सुरुवात होण्याची शक्यता आहे. या मार्गातील कर्वे पुतळा आणि डॉ. बाबासाहेब आंबेडकर चौक येथे दुमजली उड्डाणपूल उभारण्याचे नियोजन करण्यात आले आहे. या दोन्ही पुलांचा आराखडा महामेट्रोने पुणे महापालिकेकडे सादर केला असून, अंतिम मंजुरीनंतर पुढील प्रक्रिया वेगाने सुरू होणार आहे.
या उड्डाणपुलांच्या उभारणीची जबाबदारी महापालिका घेणार की महामेट्रो, याबाबत अद्याप अंतिम निर्णय झालेला नाही. महापालिका आयुक्तांनी दोन्ही पूल महापालिकेने उभारावेत, असा प्रस्ताव महामेट्रोला दिला आहे. यासंदर्भात लवकरच निर्णय होण्याची शक्यता आहे.
नळ स्टॉप-वारजे-माणिकबाग हा 6.12 किलोमीटर लांबीचा उन्नत मेट्रो मार्ग आहे. या मार्गावर कर्वे पुतळा, डहाणूकर कॉलनी, कर्वेनगर, वारजे, दौलतनगर आणि माणिकबाग अशी एकूण 6 स्थानके प्रस्तावित आहेत. केंद्र सरकारने या प्रकल्पाला गेल्या वर्षी नोव्हेंबरमध्ये मंजुरी दिली होती.
कर्वे पुतळा आणि आंबेडकर चौकातील उड्डाणपूल मेट्रो प्रकल्पाशी जोडलेले असतील. पहिल्या स्तरावर वाहनांसाठी उड्डाणपूल, तर त्याच्या वरच्या स्तरावर मेट्रो मार्ग अशी रचना करण्यात आली आहे.
दोन्ही पुलांसह संबंधित मेट्रो कामासाठी अंदाजे 404 कोटी रुपयांचा खर्च अपेक्षित आहे. महामेट्रोने जूनमध्ये या मेट्रो मार्गासाठी निविदा मागवल्या होत्या. त्यांना ऑक्टोबरपर्यंत मुदतवाढ देण्यात आली आहे. उड्डाणपुलांना वेळेत मंजुरी मिळाल्यास वर्षअखेरीस मेट्रो मार्गाचे प्रत्यक्ष काम सुरू होण्याची शक्यता आहे.
