पुणे : सोशल मीडियाच्या माध्यमातून झालेल्या ओळखीवर अंधळा विश्वास ठेवणं किती महागात पडू शकतं, हे दाखवणारी एक धक्कादायक घटना पुण्यात उघडकीस आली आहे. दिल्लीमध्ये शिक्षण घेणारी 19 वर्षीय विद्यार्थिनी सुट्टीसाठी घरी आली होती. तिला पुन्हा दिल्लीला अभ्यासासाठी जायचे होते; परंतु तिच्या पालकांनी त्याला नकार दिला. याच काळात सोशल मीडियावरून तिची महेश दिवाकर पारणकर (वय 38) याच्याशी ओळख झाली. आरोपीने तिला दिल्लीला पोहोचवण्याचे खोटे आश्वासन देऊन मदतीचे आमिष दाखवले आणि आपल्या जाळ्यात ओढले.
आरोपीच्या गोड बोलण्यावर विश्वास ठेवून तरुणी त्याच्यासोबत निघून गेली. मात्र, या मदतीच्या बहाण्याने आरोपीने तिला गहुंजे येथील ‘लोढा बेलमाँड’ या भागात डांबून ठेवले आणि तिच्यावर अत्याचार केला. पीडितेचे शोषण एवढ्यावरच थांबले नाही; आरोपीने त्याच्या एका साथीदाराच्या मदतीने तरुणीला मुंबई आणि अहमदाबाद येथे नेऊन बळजबरीने देहविक्रीच्या दलदलीत ढकलले.
या तरुणीला पूर्णपणे वेश्या व्यवसायात अडकवण्याचा आरोपींचा कट होता.या जाचातून सुटका झाल्यानंतर पीडित तरुणीने थेट पोलिसांकडे धाव घेत आपबीती सांगून तक्रार दाखल केली. या प्रकरणी कारवाई करत पोलिसांनी गहुंजे येथील रहिवासी असलेल्या महेश पारणकर याला तात्काळ अटक केली आहे. न्यायालयाने आरोपीला 28 ऑगस्टपर्यंत पोलीस कोठडी सुनावली आहे.
पोलीस या संपूर्ण प्रकरणाचा आणि त्याच्या साथीदाराचा सखोल तपास करत आहेत. सोशल मीडिया वापरताना सतर्क राहावे आणि अनोळखी व्यक्तींवर सहज विश्वास ठेवू नये, असा गंभीर इशारा या घटनेच्या निमित्ताने समोर आला आहे.
