पुणे : पुणे जिल्ह्यातील प्रसिद्ध लोहगड येथे घडलेल्या केतन अग्रवाल हत्या प्रकरणाबाबत महत्वाची माहिती समोर आली आहे.या प्रकरणातील मुख्य आरोपी सिया गोयल ही सध्या तुरुंगात असून, तिला पैशांच्या व प्रभावाच्या बळावर विशेष ‘व्हीआयपी सुविधा’ दिल्या जात असल्याचा गंभीर आरोप रिपब्लिकन सोशलिस्ट पक्षाने केला आहे.
बुधवारी पुण्यातील पत्रकार भवनात आयोजित पत्रकार परिषदेत पक्षाच्या पदाधिकाऱ्यांनी याप्रकरणी तीव्र संताप व्यक्त केला. या पत्रकार परिषदेला राहुल डंबाळे, अपर्णा दुबे, अॅड. जावेद जमादार, रुद्राणी जावळकर, कैलास देवकर, उषा आवळे आणि राहुल नागटिळक उपस्थित होते. आरोपींना जेलमध्ये अशा सवलती मिळणे हे पोलीस तपास यंत्रणेच्या पारदर्शकतेवर प्रश्नचिन्ह उपस्थित करणारे आहे, असे मत त्यांनी व्यक्त केले.
पोलीस प्रशासनाने कोणत्याही बाह्य दबावाला बळी न पडता या प्रकरणाचा तपास लवकरात लवकर पूर्ण करावा आणि न्यायालयात भक्कम पुराव्यांसह दोषारोपपत्र दाखल करावे, अशी मागणी पक्षाने केली आहे. गुन्हेगारांमध्ये कायद्याचा धाक निर्माण करण्यासाठी हा खटला ‘फास्ट ट्रॅक कोर्टात’ चालवून आरोपींना फाशी किंवा जन्मठेपेची कडक शिक्षा व्हावी. तसेच तुरुंगात सवलती देणाऱ्या दोषी अधिकाऱ्यांवर तात्काळ निलंबनाची कारवाई करण्यात यावी, अशी मागणीही यावेळी करण्यात आली.
केतन अग्रवाल हत्या प्रकरणाचा घटनाक्रम:
18 जून: केतन अग्रवाल लोहगडावर पाय घसरून दरीत पडल्याचा बनाव रचण्यात आला. मात्र, मृतदेह बाहेर काढणाऱ्या शिवदुर्ग रेस्क्यू टीमच्या संशयानंतर पोलिसांनी तपासाची चक्रे हलवली.
21 जून: सर्व विधी पार पडल्यानंतर कुटुंबीयांनी लोहगडावर जाऊन पाहणी केली आणि हा अपघात नसून हत्येचा कट असल्याचा संशय पोलिसांकडे व्यक्त केला.
बहिणीचा संशय: केतनची बहीण संजना हिने संशयित आरोपी सिया गोयल हिच्याकडे गडावरील घटनाक्रमाबाबत व फोटोग्राफीबाबत सविस्तर विचारणा केली असता सियाची उत्तरे संशयास्पद आढळली.
कॉल डिटेल्सचा पर्दाफाश: तपासादरम्यान आरोपी सिया आणि चेतन चौधरी यांच्यात गेल्या वर्षभरात तब्बल 2004 वेळा फोन संभाषण (300 हून अधिक तास) झाल्याचे CDR वरून उघडकीस आले.
सीसीटीव्ही फुटेजचा पुरावा: 18 जून रोजी भर उन्हात हुडी, हेडफोन आणि मास्क घातलेला एक तरुण लोहगडाच्या सीसीटीव्हीत आढळला, जो सियाला खुणा करत होता. पोलिसांची दिशाभूल करण्यासाठी आरोपीने स्वतःचा मोबाईल दुकानातील कामगाराकडे ठेवला होता.
अटक आणि कबुली: 22 जूनच्या रात्री पुणे ग्रामीण पोलिसांनी चेतनला (तेजस) ताब्यात घेऊन पोलिसी खाक्या दाखवताच संपूर्ण हत्येचा कट आणि सियाचा सहभाग उघड झाला.
