पुणे : वैद्यकीय उपचारांसाठी डॉक्टरांची अपॉइंटमेंट घेणे पुण्यातील एका तरुणाला चांगलेच महागात पडले आहे. अवघ्या 10 रुपयांचे नोंदणी शुल्क भरण्याच्या जाळ्यात अडकून त्याने 1 लाख 14 हजार 196 रुपये गमावले आहेत. हा धक्कादायक प्रकार पुण्याच्या मुंढवा पोलीस ठाण्याच्या हद्दीत उघडकीस आला आहे.
केशवनगर परिसरात राहणारा 34 वर्षीय तरुण 21 जुलै रोजी शहरातील प्रसिद्ध ‘दादा गुजर हॉस्पिटल’मध्ये उपचारासाठी वेळ घेण्याचा प्रयत्न करत होता. इंटरनेटवर माहिती शोधत असतानाच एका अज्ञात सायबर भामट्याने त्याच्याशी संपर्क साधला.डॉक्टरांची वेळ मिळवून देण्याचे आश्वासन देऊन भामट्याने तरुणाला मोबाईलवर एक वेब लिंक आणि ‘APK’ फाईल पाठवली. डॉक्टरांची वेळ पक्की (कन्फर्म) करण्यासाठी फक्त 10 रुपये शुल्क भरावे लागेल, असा बनाव रचण्यात आला.
तरुणाने त्या लिंकवर क्लिक करून फाईल उघडताच, हॅकर्सनी त्याच्या फोनचा आणि बँक खात्याचा अत्यंत गोपनीय डेटा चोरला.
खात्याची सर्व माहिती हाती मिळताच भामट्यांनी तात्काळ हालचाली सुरू केल्या. तरुणाला काही समजण्याआधीच त्याच्या खात्यातून टप्प्याटप्प्याने पैसे वळवले गेले. मोबाईलवर एकापाठोपाठ एक पैसे कट झाल्याचे मेसेज येताच तरुणाचे भान हरपले. एकूण 1,14,196 रुपये गायब झाल्याचे स्पष्ट झाल्यावर त्याने तातडीने पोलिसांत धाव घेतली.
या प्रकरणी आता मुंढवा पोलीस ठाण्यात सायबर फसवणुकीचा गुन्हा दाखल करण्यात आला असून, पोलीस अज्ञात आरोपींचा शोध घेत आहेत.
