पुणे : जालना जिल्ह्यातील अंतरवाली सराटी येथे मराठा आणि ओबीसी आरक्षणाच्या मुद्द्यावरून वातावरण तापले आहे. मराठा आरक्षणासाठी उपोषणाला बसलेले आंदोलक मनोज जरांगे पाटील यांच्या उपोषणाचा आज 9 वा दिवस आहे. प्रकृती खालावल्यामुळे संपूर्ण राज्यात मराठा समाज आक्रमक झाला आहे.
हैदराबाद गॅझेटनुसार तात्काळ प्रमाणपत्रे वाटप सुरू करण्याची ठाम भूमिका जरांगे पाटील यांनी घेतली आहे. तीन दिवसांपूर्वी भाजप आमदार प्रसाद लाड यांनी जरांगे पाटील यांची भेट घेऊन उपोषण मागे घेण्याची विनंती केली होती, परंतु तोडगा निघालेला नाही. दुसरीकडे, ओबीसी आंदोलक मंगेश ससाने यांनी याच गावात लाक्षणिक उपोषण सुरू केल्याने तणाव वाढला आहे. काहीही झाले तरी आंदोलन मागे घेणार नाही, असा पवित्रा त्यांनी घेतला आहे.
अंतरवालीतील सोनिया नगर येथे अॅड. मंगेश ससाणे, प्रा.विठ्ठल तळेकर , सतीश कुलाल, बाबासाहेब बटुळे आणि त्यांच्या सहकाऱ्यांनी रविवारी उपोषण सुरू केले आहे . जरांगे यांच्या आंदोलनातून सरकारवर दबाव टाकला जात असल्याचा आरोप करत ओबीसींचे हक्क व संविधानिक आरक्षण टिकवण्यासाठी हे आंदोलन असल्याचे ससाणे यांनी सांगितले.
एकाच गावात दोन्ही बाजूंचे आंदोलक आमनेसामने आल्याने कायदा व सुव्यवस्थेचा प्रश्न निर्माण होऊ नये म्हणून पोलिसांनी चोख बंदोबस्त तैनात केला आहे. तोडगा काढण्यासाठी वेगाने चर्चा सुरू आहेत. दोन्ही समाजाच्या आक्रमक भूमिकेमुळे संपूर्ण महाराष्ट्राचे लक्ष अंतरवाली सराटीवर केंद्रित झाले आहे.
