नवी दिल्ली : भारतीय राष्ट्रध्वज (तिरंगा झेंडा) आता दिवस आणि रात्र असे चोवीस तास फडकाविता येणार आहे. देशाच्या ध्वज संहितेमध्ये बदल करण्याचा निर्णय केंद्र सरकारने घेतला आहे.
देशाच्या स्वातंत्र्याच्या अमृत महोत्सवाचे औचित्य साधून केंद्राने १३ ते १५ ऑगस्ट या काळामध्ये ‘हर घर तिरंगा’ ही मोहीम राबविण्याची घोषणा केली आहे. त्या पार्श्वभूमीवर ध्वज संहितेमध्ये बदल करण्यात आले आहेत. हे बदल अत्यंत महत्त्वपूर्ण मानले जात आहेत. यासंदर्भात केंद्रीय गृहसचिव अजय भल्ला यांनी सर्व मंत्रालये आणि विभागांना याबाबतचे पत्र पाठविले आहे.
‘हर घर तिरंगा’ या मोहिमेंतर्गत आता पोलिस्टरपासून तयार करण्यात आलेले. तसेच मशीनवर तयार करण्यात आलेल्या राष्ट्रध्वजालाही वंदन करता येणार आहे. तसेच केंद्र सरकारने ध्वज संहितेमध्ये केलेल्या बदलामुळे राष्ट्रध्वज दिवसा- रात्री देखील फडकाविता येणार आहे.
दरम्यान, राष्ट्रध्वजवंदनाबाबतचे नियम हे भारताची वण संहिता-२००२ आणि राष्ट्रीय सन्मानांचा अवमान प्रतिबंधक कायदा-१९७१ अंतर्गत निश्चित करण्यात आले आहेत. आता २००२ च्या ध्वज संहितेमध्ये बदल करण्यात आले आहेत. याआधी केवळ सूर्योदयापासून ते सूर्यास्तापर्यंतच कोणत्याही परिस्थितीत राष्ट्रध्वज फडकाविता येत होता. तसेच मशीनवर तयार करण्यात आलेले तसेच पॉलिस्टरचे राष्ट्रध्वजाला परवानगी दिली जात नसे.
