Mumbai Crime: चित्रपट आणि वेब सिरीजमध्ये काम मिळवून देण्याचे आमिष दाखवून मुंबईतील अनेक तरुणींची फसवणूक झाल्याचा एक नवा प्रकार समोर आला आहे. एका अज्ञात व्यक्तीने स्वतःची ओळख प्रसिद्ध चित्रपट निर्माता विकास बहल अशी सांगून इन्स्टाग्रामवर अकाउंट तयार केले. ऑडिशनच्या नावाखाली त्याने तरुणींना बिकिनी आणि अर्धनग्न अवस्थेतील खासगी फोटो मागितले, तसेच त्यांच्याकडून पैसे उकळले आणि नंतर संपर्क तोडला. याप्रकरणी खार पोलिसांनी गुन्हा दाखल करून तपास सुरू केला आहे. (Marathi latest Crime news)
ऑडिशनच्या नावाखाली खासगी फोटोची मागणी
पोलिसांनी दिलेल्या माहितीनुसार, या अज्ञात आरोपीने सोशल मीडियाच्या माध्यमातून अनेक इच्छुक अभिनेत्रींशी संपर्क साधला. त्यांना मोठ्या चित्रपट आणि वेब सिरीजमध्ये काम देण्याचे आश्वासन दिले. कथित निवड प्रक्रियेचा भाग म्हणून त्याने तरुणींना बिकिनीमधील तसेच त्यांचे अर्धनग्न फोटो पाठवण्यास सांगितले. आरोपी निर्माता असल्याच्या भ्रमात काही पीडित तरुणींनी त्याला पैसे दिले आणि खाजगी फोटो देखील पाठवले. फोटो आणि पैसे मिळाल्यानंतर आरोपी फोन बंद करून टाकायचा. आरोपीने अनेक तरुणींना प्रत्यक्ष भेटण्यासाठी बोलावले होते, जिथे त्याने गैरवर्तन केल्याचेही समोर आले आहे.
हेही वाचा: लोणी काळभोर येथून 15 वर्षाच्या मुलीला फूस लावून पळवून नेले
आपल्या नावाने फसवणूक सुरू असल्याची माहिती जेव्हा खरे निर्माता-दिग्दर्शक विकास बहल यांना मिळाली, तेव्हा त्यांनी तत्काळ खार पोलीस ठाण्यात धाव घेऊन एका अज्ञात व्यक्तीविरुद्ध तक्रार दाखल केली. यानंतर फसवणूक झालेल्या काही पीडित तरुणींनीही तक्रार दिली.
खार पोलिसांनी या अज्ञात आरोपीविरुद्ध फसवणूक, माहिती तंत्रज्ञान कायद्याचे उल्लंघन आणि महिलांचा छळ या कलमांखाली गुन्हा दाखल केला आहे. आरोपीचे पीडित तरुणींसोबतचे चॅट्स, त्याचे सोशल मीडिया अकाउंट, कॉल डिटेल्स आणि सीसीटीव्ही फुटेजची कसून तपासणी पोलीस करत आहेत.
