Money Plant : घरात मनी प्लांट लावल्याने आर्थिक समृद्धी आणि सकारात्मक ऊर्जा वाढते, असा विश्वास अनेक लोकांमध्ये आढळतो. त्यामुळे अनेक घरांमध्ये सजावटीसोबतच “नशीब उजळवणारे रोप” म्हणून मनी प्लांट लावले जाते. मात्र या रोपाबाबत काही विचित्र समजुतीही प्रचलित आहेत. त्यापैकी एक म्हणजे मनी प्लांट चोरी करून लावल्यास जास्त फायदा होतो. काही लोकांचा असा समज आहे की, एखाद्या श्रीमंत व्यक्तीच्या घरातून मनी प्लांटची छोटी फांदी आणून घरात लावली तर त्यांची संपत्ती आपल्याकडे येते.
परंतु वास्तुशास्त्राच्या दृष्टीने ही समजूत चुकीची मानली जाते. कोणतीही वस्तू चोरी करून घरात आणल्यास त्यामध्ये नकारात्मक ऊर्जा निर्माण होते. त्यामुळे अशा प्रकारे आणलेले रोप घरात सकारात्मक परिणाम देत नाही. उलट आर्थिक अडचणी निर्माण होण्याची शक्यता असल्याचे तज्ज्ञ सांगतात. त्यामुळे मनी प्लांट नेहमी स्वतःच्या पैशाने खरेदी करूनच घरात लावणे अधिक शुभ मानले जाते. असे केल्यास घरात समृद्धी आणि स्थैर्य येते, असा समज आहे.
वास्तुशास्त्रानुसार मनी प्लांट ठेवण्याची योग्य दिशा देखील महत्त्वाची मानली जाते. घराच्या आग्नेय दिशेला हे रोप ठेवणे शुभ मानले जाते. ही दिशा संपत्ती आणि समृद्धीशी संबंधित असल्याचे मानले जाते. मात्र ईशान्य दिशेला मनी प्लांट ठेवू नये, असा सल्ला तज्ज्ञ देतात.
मनी प्लांटच्या वेली नेहमी वरच्या दिशेने वाढताना दिसाव्यात, असेही सांगितले जाते. खाली लटकणाऱ्या किंवा जमिनीवर पडणाऱ्या वेली आर्थिक नुकसानाचे प्रतीक मानल्या जातात. त्यामुळे वेली वर चढतील असा आधार देणे योग्य मानले जाते.
याशिवाय झाडाची पाने नेहमी हिरवी आणि ताजी ठेवणेही महत्त्वाचे मानले जाते. पाने पिवळी किंवा सुकलेली दिसल्यास ती त्वरित काढून टाकावीत. वाळलेले रोप घरात नकारात्मकता आणते, असा समज आहे.
मनी प्लांट लावण्यासाठी सकाळ किंवा संध्याकाळचा वेळ चांगला मानला जातो. विशेषतः शुक्रवारी हे रोप लावणे आर्थिक समृद्धीसाठी शुभ मानले जाते.
काही लोकांच्या मते मनी प्लांटला पाणी घालताना त्यात थोडे दूध मिसळल्यास घरात लक्ष्मीचा आशीर्वाद राहतो. मात्र या सर्व गोष्टी श्रद्धा आणि परंपरांवर आधारित असल्याचे लक्षात ठेवणेही तितकेच महत्त्वाचे आहे.
