अक्षय टेमगिरे
रांजणगाव गणपती : मोबाईल फोन विश्वासाने घेऊन तो परत न देता, त्यातील यूपीआय आणि फोन-पेच्या माध्यमातून विविध खात्यांतून तब्बल ३ लाख ४४ हजार ५९६ रुपये काढून घेतल्याचा प्रकार रांजणगाव गणपती येथे समोर आला आहे.
याप्रकरणी रांजणगाव एमआयडीसी पोलीस ठाण्यात कुणाल बळजकर याच्याविरुद्ध फसवणूक व अपहाराचा गुन्हा दाखल करण्यात आला आहे.
याबाबत रांजणगाव गणपती येथे राहणाऱ्या २५ वर्षीय तरुणीने फिर्याद दिली आहे. पोलिसांनी दिलेल्या माहितीनुसार १४ जून २०२६ ते १९ ऑगस्ट २०२६ या कालावधीत फिर्यादीचा ओपो ए१६ मोबाईल फोन आरोपीकडे विश्वासाने देण्यात आला होता. मात्र आरोपीने मोबाईल परत न करता तो स्वतःकडेच ठेवला.यानंतर आरोपीने संबंधित मोबाईलमधील यूपीआय आणि फोन-पेच्या माध्यमातून महाराष्ट्र बँक तसेच फीनो बँकेतील खात्यांमधून वेळोवेळी एकूण ३ लाख २९ हजार ५९६ रुपये काढल्याचे फिर्यादीत नमूद करण्यात आले आहे.
मोबाईलची किंमत व काढलेली रक्कम मिळून एकूण ३ लाख ४४ हजार ५९६ रुपयांचा अपहार केला आहे.याप्रकरणी रांजणगाव एमआयडीसी पोलीस ठाण्यात गुन्हा दाखल करण्यात आला असून.
या गुन्ह्याचा पुढील तपास पोलीस हवालदार पवार हे करीत आहेत.
