पुणे : महाराष्ट्र शासनाच्या ‘मुख्यमंत्री माझी लाडकी बहीण’ या महत्त्वाकांक्षी योजनेअंतर्गत पात्र महिलांना दरमहा 1500 रुपयांची आर्थिक मदत दिली जाते. सध्या जुलै आणि ऑगस्ट महिन्याचा हप्ता अनेक लाभार्थी महिलांच्या खात्यात जमा झालेला नाही. त्यातच रक्षाबंधनाचा सण जवळ आल्याने, या दोन्ही महिन्यांचे मिळून एकत्रित 3000 रुपये महिलांना मिळणार असल्याची चर्चा राजकीय वर्तुळात आणि नागरिकांमध्ये सुरू आहे.
2024 मध्ये देखील अशाच प्रकारे महिलांना एकत्रित 3000 रुपये मिळाले होते, त्यामुळे यंदाही दोन्ही हप्ते एकत्र मिळण्याची शक्यता वर्तवली जात आहे. मात्र, याबाबत प्रशासनाकडून अजून कोणतीही अधिकृत घोषणा किंवा स्पष्टीकरण आलेले नाही.
दरम्यान, या योजनेचे हप्ते वेळेत वितरीत करण्यासाठी राज्य सरकारने निधीची व्यवस्था करण्यास सुरुवात केली आहे. जुलै महिन्याचा हप्ता पात्र महिलांपर्यंत पोहोचवण्यासाठी सामाजिक न्याय विभागाच्या अंदाजपत्रकातील 344.74 कोटी रुपयांचा निधी महिला व बालविकास विभागाकडे हस्तांतरित करण्यात आला असून यासंदर्भातील शासन निर्णय (GR) जारी करण्यात आला आहे.
योजना सुरू झाल्यापासून निधीची टंचाई दूर करण्यासाठी इतर विभागांचा पैसा लाडकी बहीण योजनेकडे वळवण्याची ही पहिलीच वेळ नाही. यापूर्वीही खालीलप्रमाणे निधीचे हस्तांतरण करण्यात आले होते. एप्रिल आणि मे महिन्याच्या मानधनासाठी 410 कोटी रुपये वळवण्यात आले.तसेच जानेवारी महिन्याच्या हप्त्यासाठी 98.45 कोटी रुपयांचा निधी वळवला गेला आहे .
सामाजिक न्याय आणि आदिवासी विकास यांसारख्या महत्त्वाच्या विभागांचा हजारो कोटी रुपयांचा निधी सातत्याने या योजनेसाठी वापरला जात असल्याने, त्या विभागांच्या मूळ कल्याणकारी योजनांवर आणि उपक्रमांवर याचा विपरीत परिणाम होत असल्याचे दिसून येत आहे.
