दौड : पुणे-सोलापूर महामार्गालगत गुराख्याला चहा पिण्यासाठी हॉटेलमध्ये पाठवून त्याच्या ताब्यातील सात शेळ्या चोरून नेल्याची घटना मळद (ता. दौंड) गावच्या हद्दीत घडली. या चोरीत पाच मोठ्या शेळ्या, एक पाठ आणि एक बोकड अशी एकूण सात जनावरे चोरली आहेत. ही घटना रविवारी (ता. 15) दुपारी सव्वा एक वाजण्याच्या सुमारास घडली. याप्रकरणी दौंड पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे.

याप्रकरणी भागोजी रामदास गावडे (वय -40, रा. रावणगाव, ता. दौंड) यांनी दौंड पोलीस ठाण्यात फिर्याद दिली आहे. त्यानुसार अज्ञात चोरट्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, 15 नोव्हेंबर रोजी गावडे यांच्या आई अलका यांनी घरासमोरील पत्र्याच्या शेडमध्ये बांधलेल्या शेळ्या चारण्यासाठी मुक्या नावाच्या व्यक्तीकडे दिल्या होत्या. तो मळद गावच्या हद्दीत हॉटेल न्यू माऊलीजवळील कॅनॉलच्या भरावावर शेळ्या चारत होता. त्यावेळी एका अनोळखी मोटारसायकलस्वाराने हाताने खुणा करून त्याला पंक्चरच्या दुकानाजवळ बोलावले.

त्यानंतर त्या व्यक्तीने मुक्या याला चहा पिण्यासाठी हॉटेलमध्ये पाठविले. तो परत येईपर्यंत अज्ञात चोरट्यांनी त्याच्या ताब्यातील पाच मोठ्या शेळ्या, एक पाठ आणि एक बोकड अशी 36 हजार रुपये किमतीची सात जनावरे चोरून नेली. या प्रकरणी दौंड पोलीस ठाण्यात गुन्हा दाखल करण्यात आला असून, पुढील तपास पोलीस हवालदार मदने करीत आहेत.







